დღეს, 21 აპრილს ოქროს ფასმა რეკორდულ მაჩვენებელს მიაღწია აშშ-სა და ჩინეთს შორის სავაჭრო ომისა და ეკონომიკური ზრდის შენელების საფრთხის გამო.
დილის ვაჭრობაზე, ოქრო კიდევ გაძვირდა და უნციაზე $3400 შეადგინა.
დოლარის ინდექსი ბოლო სამი წლის მინიმუმამდე დაეცა, რამაც ოქრო უფრო მიმზიდველი გახადა. ოქროზე მოთხოვნა გაიზარდა ცენტრალური ბანკების მხრიდან, რაც ხელს უწყობს ფასების შემდგომ ზრდას.
როგორც ცნობილია, 2 აპრილს აშშ-ის პრეზიდენტმა დონალდ ტრამპმა ათობით ქვეყანას საბაჟო ტარიფები გაუზარდა. მოგვიანებით ზოგიერთ მათგანს გაზრდილი განაკვეთები გადაუვადა, ხოლო ჩინეთს კიდევ გაუზარდა. თავის მხრივ, ჩინეთმა საპასუხო ტარიფები დაუწესა აშშ-ს, ხოლო სხვა ქვეყნები გააფრთხილა, რომ თავი შეიკავონ შეერთებულ შტატებთან ეკონომიკური გარიგებების დადებისგან, რაც დააზიანებს ჩინეთის ინტერესებს.
ამავდროულად, ტრამპმა გააკრიტიკა აშშ-ის ფედერალური რეზერვის თავმჯდომარე ჯერომ პაუელი. მისი გუნდი პაუელის გათავისუფლებაზეც კი ფიქრობს. ამ ფონზე, ოქრო, როგორც „უსაფრთხო თავშესაფარი“, მიმზიდველად გამოიყურება ინვესტორებისთვის.
ეკონომისტები ვარაუდობენ, რომ მალე ოქრო $3,500-ს მიაღწევს.
ვერცხლი გაიზარდა 0,4%-ით, $32,71-მდე, პლატინის ფასი $969,65-მდე გაიზარდა, ხოლო პალადიუმი $957,68- მდე შემცირდა.
