ოქროს ფასი კვირის ბოლო სავაჭრო დღეს უნციაზე $1948,11-მდე დაეცა, ხოლო ოქროს ფიუჩერსების ფასმა $1947,40 შეადგინა.
ფასის ცვლილება ამჯერად აშშ-ის შრომის ბაზრის მონაცემებმა გამოიწვია. 2 ივნისს გამოქვეყნებულმა მონაცემებმა აჩვენა, რომ აშშ-ში უმუშევრობის დონე, აპრილში დაფიქსირებული 3,4%-დან მაისში 3,7%-მდე გაიზარდა, რაც 2022 წლის ოქტომბრის შემდეგ ყველაზე მაღალი მაჩვენებელია, ხოლო სამუშაო ადგილების რაოდენობა მოსალოდნელზე მეტად, 339 ათასით გაიზარდა.
შრომის ბაზარზე არსებულმა მდგომარეობამ აშშ-ის ფედერალური რეზერვის მიერ მონეტარული პოლიტიკის გამკაცრების ალბათობა გაზარდა. უმუშევრობის მნიშვნელოვანი ზრდა, ხელფასების ზრდის შენელებასთან ერთად, Fed-ისთვის განაკვეთის გაზრდის საფუძველს ქმნის.
თავის მხრივ, მონეტარული პოლიტიკის გამკაცრება დოლარის გამყარების და აშშ-ს სახელმწიფო ობლიგაციებზე პროცენტის ზრდის წინაპირობაა, რაც ამცირებს ოქროზე მოთხოვნასა და მის ფასს.
გამკაცრდება თუ არა მონეტარული პოლიტიკა, ფედერალური რეზერვის სხდომაზე გადაწყდება, რომელიც ივნისში გაიმართება. მნიშვნელოვანი იქნება მაისის თვის ინფლაციის მონაცემები, რომელიც ივნისის შუა რიცხვებში უნდა გამოქვეყნდეს.
