ჯანდაცვის საპარლამენტო კომიტეტი დაეთანხმა ონკოპაციენტების პეტიციას დაფინანსებასთან დაკავშირებით და სამართლიანად მიიჩნია თითოეული მათგანის მკურნალობისთვის ინდივიდუალური ბიუჯეტის გამოყოფა.
ონკოპაციენტების მიერ პარლამენტისთვის გაგზავნილი პეტიცია, ჯანდაცვის კომიტეტმა გუშინ განიხილა. კომიტეტის თავმჯდომარის – ზაზა ლომინაძის განმარტებით, ონკოპაციენტების დაფინანსების წლიური თანხა სახელმწიფომ 15-დან 25 ათას ლარამდე გაზარდა, თუმცა, კომიტეტში შესული პეტიციის ავტორები, 6 ათასი პაციენტი, მოითხოვდა ამ თანხის არა თანაბრად, არამედ ინდივიდუალურად მორგებული სისტემით განაწილებას.
ზაზა ლომინაძის თქმით, ეს მოთხოვნა კომიტეტმა გაიზიარა და ის ჯანდაცვის სამინისტროს გადაუგზავნა, რომელმაც უნდა გადაწყვიტოს, როდიდან შეძლებს ონკოპაციენტების ინდივიდუალურად დაფინანსებას, რაც, ლომინაძის შეფასებით, უფრო სამართლიანი და სწორი იქნება.
„ეს ცვლილება ისედაც იყო დასახული და მინისტრსა და მინისტრის მოადგილეებს ამის შესახებ მანამდეც ჰქონდათ გაკეთებული განცხადებები. დარწმუნებული ვარ, სულ მალე ონკოპაციენტების დაფინანსება იქნება ინდივიდუალურად მორგებული“, – განაცხადა ჯანდაცვის კომიტეტის თავმჯდომარემ.
ონკოპაციენტები ასევე ითხოვენ ძვირად ღირებული მკურნალობის ლიმიტის გარეშე დაფინანსებას. პეტიციის ავტორებს სურთ, რომ შეიქმნას დაზღვევის უნივერსალური პაკეტი, რომელშიც ონკოლოგიური დაავადების მკურნალობის დაფინანსების ლიმიტი იქნება მაღალი და არა ისეთი, როგორიც ახლაა, როცა პაკეტების დიდ ნაწილში ონკოლოგიური მკურნალობის ლიმიტი საერთოდ არაა ან ძალიან მცირეა.
ასევე ხაზგასმულია პრობლემები რეგიონებში მცხოვრები პაციენტებისთვის მკურნალობაზე ხელმისაწვდომობასთან დაკავშირებით.
პეტიციას ხელი საქართველოს 6000-ზე მეტმა მოქალაქემ მოაწერა.
