ნავთობის ფასი პარასკევის ვაჭრობაზე ერთ ბარელზე დოლარზე მეტით დაეცა.
ზედიზედ მეორე კვირაა ნავთობის ფასი მსოფლიო ბაზარზე იკლებს- WTI ფიუჩერსები ყოველკვირეულად 2%-ით ეცემა, ხოლო Brent-ის ფასი -1.6%-ით.
Brent-ის ტიპის ნავთობის ფიუჩერსების ფასმა კვირის ბოლოს ბარელზე $74,79 შეადგინა, ხოლო Texas Intermediate ნავთობის ფასი $70,17-ზე ჩამოვიდა.
ამჯერად ფასის ვარდნას ბიძგი მისცა ჩინეთის ეკონომიკური მონაცემების გამოქვეყნებამ, რომელმაც აჩვენა, რომ ექსპორტი შემცირებულია, რამაც ნავთობზე მოთხოვნის კლების მოლოდინი შექმნა.
სავაჭრო ბირჟებზე გაჩნდა ვარაუდი, რომ ჩინეთში მოთხოვნის კლება გადაფარავს საუდის არაბეთის გადაწყვეტილებას, ნავთობის მოპოვების შემცირების შესახებ.
ამ ფაქტორს ემატება მონაცემები, აშშ-ის ნავთობის მარაგების ზრდის შესახებ.
ასევე, მედიაში გავრცელდა ინფორმაცია, რომ აშშ-ირანის ბირთვული შეთანხმება გარდაუვალია და ეს გამოიწვევს ბაზარზე ნავთობის მეტი მოცულობით მიწოდებას. მოგვიანებით ორივე ქვეყანამ უარყო ეს ინფორმაცია, რის გამოც ფასის კლება შეჩერდა.
ექსპერტების პროგნოზით, გადამწყვეტი ფაქტორი იქნება ზაფხულის სეზონზე საწვავზე მოთხოვნის ზრდის ოდენობა. ინვესტორები დაელოდებიან, სანამ ნავთობის მარაგის უფრო დიდი კლება გახდება შესამჩნევი.
ზოგიერთი ანალიტიკოსი ნავთობის ფასების ზრდას იმ შემთხვევაში ვარაუდობს, თუ აშშ-ის ფედერალური რეზერვი შეაჩერებს საპროცენტო განაკვეთების ზრდას მომდევნო სხდომაზე, რომელიც 13-14 ივნისს უნდა გაიმართოს.
ანალიტიკოსების თქმით, ფედერალური რეზერვის გადაწყვეტილებამ შესაძლოა გავლენა მოახდინოს საუდის არაბეთის მომავალ ნაბიჯზე მოპოვების შემცირებასთან დაკავშირებით.
