ავიაბილეთების რუსულ ონლაინსერვისებში რუსეთიდან საქართველოს მიმართულებით ფრენების მიმართ ინტერესი დაახლოებით 3-ჯერ გაიზარდა. ამის შესახებ რუსული მედია წერს.
მოსკოვი-თბილისის მიმართულება მომხმარებლების დაინტერესების მხრივ, მხოლოდ სოჭისა და პეტერბურგის მარშრუტებს ჩამორჩება.
პირდაპირი რეისების დანიშვნის შემდეგ, ავიასერვისების ოფისებში აქტიურად კითხულობენ მგზავრობისთვის საჭირო დოკუმენტების შესახებ.
„ბილეთების გაყიდვებმა დაიწყო თანდათან ზრდა, მაგრამ უფრო ნელა, ვიდრე საჭირო დოკუმენტების მოძიებამ“, – ამბობს ერთ-ერთი ავიაკომპანიის ონლაინსერვისის ხელმძღვანელი.
მისი თქმით, პირდაპირ ფრენების დაწყებამდეც, საქართველო პოპულარობით Top 20 ქვეყანას შორის იყო და წინა წელთან შედარებით, ბილეთებზე მოთხოვნა 45%-ით არის გაზრდილი.
პირდაპირი ფრენების დაწყებამდე საქართველოში მოსახვედრად რუსეთიდან ყველაზე ხშირად მიფრინავდნენ ერევანში (41,4% ), მინსკში (29,4%) და ბაქოში (25,7%).
პირდაპირ რეისზე მოსკოვიდან თბილისის მიმართულებით ცალმხრივი ბილეთის ფასი მაისში და ივნისში 570 ლარიდან იწყება.
