კომუნიკაციების სექტორში მომხმარებლები ყველაზე ხშირად უკმაყოფილებას სილქნეტის მომსახურების მიმართ გამოთქვამენ.
ამას აჩვენებს კომუნიკაციების სფეროში საზოგადოებრივი ინტერესების დამცველის სამსახურში შესული საჩივრები. ყველაზე მეტი საჩივარი სწორედ სილქნეტის მისამართით არის შესული.
2022 წელს კომუნიკაციების ომბუდსმენს მომხმარებლებმა სულ 1227 საჩივრით მიმართეს, საიდანაც 440 საჩივარი სილქნეტს ეხებოდა, შემდეგი იყო მაგთიკომი, რომლის მიმართ მომხმარებლებს 376 საჩივარი აქვთ შეტანილი, ვიონი საქართველო – 78 საჩივარი, შპს სტერეო+ -39 საჩივარი, ახალი ქსელები – 31 საჩივარი და ა.შ.
საზოგადოებრივი დამცველის სამსახურის ინფორმაციით, წლიდან წლამდე მომსახურებით უკმაყოფილო მომხმარებლების საჩივრების რიცხვი იზრდება. თუ 2019 წელს სამსახურში 714 იყო შესული. 2021 წელს ეს მაჩვენებელი – 971-მდე გაიზარდა, 2020 წელს 822 შეადგინა, ხოლო 2022 წელს კომუნიკაციების ომბუდსმენს 1227 საჩივრით მიმართეს.
რაზე ჩივიან მომხმარებლები
საჩივრების დიდი ნაწილი ინტერნეტ მომსახურების სფეროში არსებულ დარღვევებს ეხება.
ყველაზე მეტად მომხმარებლები ელექტრონული საკომუნიკაციო კავშირის დაზიანებას და მომსახურების შეწყვეტის პირობებს უჩივის. ამ საკითხზე საზოგადოებრივ დამცველს 375 -ჯერ მიმართეს.
276 საჩივარი უხარისხო სატელეკომუნიკაციო მომსახურებას ეხებოდა, 188 – სატელეკომუნიკაციო მომსახურების პაკეტების ცვლილებას და ა.შ.
ომბუდსმენის სამსახურის ინფორმაციით, საჩივრების 90% კომპანიებსა და მომხმარებელს შორის მორიგების, მედიაციის გზით წყდება.
