მთავრობა იმპორტირებულ ფქვილზე 5 თვის ვადით საიმპორტო საფასურს დააწესებს. გადაწყვეტილება ძალაში, სავარაუდოდ, 10 ივნისიდან შევა.
მარცვლეულის, ხორბლისა და ფქვილის მწარმოებელთა ასოციაციებისა და პურის მრეწველთა კავშირის წარმომადგენლებთან შეხვედრაზე გარემოს დაცვისა და სოფლის მეურნეობის მინისტრმა ოთარ შამუგიამ ქართული ხორბლის კონკურენტუნარიანობის გაზრდისა და ადგილობრივ ბაზარზე რეალიზაციის ხელშეწყობის მიზნით მიღებულ გადაწყვეტილებებზე ისაუბრა.
„ბოლო ორი წლის განმავლობაში შევძელით, რომ ხორბლის წარმოება 60%-ით გაგვეზარდა. წელსაც ველოდებით, რომ ზრდის დინამიკა შენარჩუნებული იქნება. მივიღეთ გადაწყვეტილება, რომ ფქვილის იმპორტზე დაწესდება დამატებითი საფასური, რაც წისქვილკომბინატების მუშაობას კონკურენტუნარიანს გახდის. მთავარი ამოცანა არის, რომ პურზე ფასები შენარჩუნდეს. ყველას მხარესთან შეჯერებული გვაქვს ეს პოზიციები“, – განაცხადა ოთარ შამუგიამ.
პურის მრეწველთა კავშირის თავმჯდომარე მალხაზ დოლიძე ამბობს, რომ პური არ გაძვირდება. „ისეთი ოდენობაზეა განსაზღვრული ფქვილის ღირებულება, რომ არსებული ფასები არ გაიზარდოს“.
მარცვლეულის მწარმოებელთა ასოციაციის თავმჯდომარის – ნიკოლოზ ბენიანიძის აზრით, ფქვილზე დამატებითი საფასურის დაწესება ხორბალს უფრო კონკურენტუნარიანს გახდის, შესაბამისად, დაიწყება ხორბლის იმპორტი. ამუშავდება წისქვილი და ფერმერები შეძლებენ პროდუქციის – როგორც ძველი, ასევე ახალი მოსავლის გაყიდვას.
წლის დასაწყისიდან მარცვლეულის მწარმოებელი ფერმერები მთავრობას მარცვლეულის რეალიზაციაში დახმარებას სთხოვენ. ამ მიზნით ფერმერთა გაერთიანებაც შექმნეს. მათ მთავრობას რუსული ფქვილის იმპორტზე ბაჟის შემოღების ინიციატივით მიმართეს. ასოციაციები ფქვილზე ბაჟის შემოღებით სტაბილური ფასის გარანტიას იძლეოდნენ და ამბობდნენ, რომ ეს დარგის გადარჩენის გზა იქნებოდა.
სოფლის მეურნეობის მინისტრი აცხადებდა, რომ ფერმერებს ხორბალი ჩაუბარებელი არ დარჩებოდათ და წისქვილებიც ამუშავდებოდა, თუმცა, დღემდე გადაწყვეტილება მიღებული არ იყო.
