საქართველოს პრემიერ-მინისტრი ირაკლი ღარიბაშვილი ამბობს, რომ ქვეყნის სასამართლო სისტემა სამაგალითოა. ამის შესახებ მან იუსტიციის უმაღლესი საბჭოს წევრებთან შეხვედრის შემდეგ გამართულ ბრიფინგზე განაცხადა.
„მე ვამაყობ ჩვენი სასამართლოთი, მე ვამაყობ ყველა მოსამართლით, ისინი არიან ძალიან მაღალკვალიფიციური პროფესიონალები, რომლებიც ემსახურებიან ჩვენს ქვეყანას, ემსახურებიან ჩვენი ქვეყნის გაძლიერებას, იცავენ ჩვენს სუვერენიტეტსა და ეროვნულ პოლიტიკას”, – განაცხადა ირაკლი ღარიბაშვილმა.
საქართველოს პრემიერ-მინისტრმა სამაგალითო უწოდა სანქცირებულ მოსამართლეებსაც.
მისი თქმით, მთავრობა ყველაფერს გააკეთებს, რომ კიდევ უფრო მეტად გააძლიეროს სასამართლოს დამოუკიდებლობა და თავისუფლება.
„ჩვენ მაქსიმალურ მხარდაჭერას აღმოვუჩენთ თქვენს ინიციატივებს, ახალ პროგრამებს. დღეს სასამართლო რომ გვაქვს თავისუფალი კორუფციისგან, ყოველგვარი ჩარევისგან, ზეწოლისგან, ეს, რა თქმა უნდა, ჩვენი გუნდის, ნინო ქადაგიძისა და მოსამართლეების დამსახურება”, – თქვა ირაკლი ღარიბაშვილმა.
ეს პრემიერ-მინისტრის პირველი საჯარო შეხვედრა იყო მოსამართლეებთან მას შემდეგ, რაც რამდენიმე მათგანს აშშ-მა სანქცია დაუწესა.
„ყველა ეს მოსამართლე, რომელზეც გავრცელდა ეს გადაწყვეტილება, მე ვიცი და ყველამ იცის, რომ ესენი არიან მაღალკვალიფიციური, პროფესიონალი მოსამართლეები, რომლებიც თავისი შეგნებით ემსახურებიან ჩვენი ქვეყნის დამოუკიდებლობას, გაძლიერებას”, – თქვა მან.
აშშ-მა სავიზო სანქციები დაუწესა საქართველოს სამ მოქმედ და ერთ ყოფილ მოსამართლეს და მათი ოჯახის წევრებს. ესენი არიან თბილისის სააპელაციო სასამართლოს თავმჯდომარე მიხეილ ჩინჩალაძე, იუსტიციის უმაღლესი საბჭოს წევრი ლევან მურუსიძე, თბილისის სააპელაციო სასამართლოს თავმჯდომარის მოადგილე ირაკლი შენგელია და თბილისის სააპელაციო სასამართლოს ყოფილი თავმჯდომარე ვალერიან ცერცვაძე (ყოფილი მოსამართლე).
