გერმანიის ყოფილმა კანცლერმა ანგელა მერკელმა კვლავ სცადა რუსეთის მიმართ თავისი პოლიტიკის დაცვა. მერკელმა გაზეთ Die Zeit-თან ინტერვიუში თქვა, რომ მისი აზრით, უკრაინის ომის მიუხედავად, ეს სწორი პოლიტიკა იყო.
„ვცდილობდი ამ სიტუაციის თავიდან აცილებას იმით, რაც ჩემს ხელთ იყო. ის ფაქტი, რომ ამან არ იმუშავა, არ ნიშნავს, რომ ეს მცდელობა არასწორი იყო“, – განაცხადა მერკელმა.
ის ასევე თვლის, რომ 2014 წელს, ყირიმის ანექსიის შემდეგ, აღმოსავლეთ უკრაინაში კონფლიქტის მოგვარების მცდელობები – კიევის, მოსკოვის, ბერლინისა და პარიზის მიერ მიღწეული მინსკის შეთანხმებები ასევე სწორი იყო.
დეკემბერში მერკელმა განაცხადა, რომ ამ შეთანხმებამ უკრაინას „ძვირფასი დრო“ მისცა, რომ „გაძლიერებულიყო“. მისი კომენტარი მოსკოვმა გამოიყენა იმის დასამტკიცებლად, რომ არა მხოლოდ უკრაინა, არამედ გერმანია და საფრანგეთი არ აპირებდნენ შეთანხმების შესრულებას: „თურმე მათ ჩვენც მოგვატყუეს“, – თქვა რუსეთის პრეზიდენტმა ვლადიმერ პუტინმა მერკელის სიტყვებზე.
ყოფილი კანცლერი ასევე ამბობს, რომ მართებულად მიიჩნევს 2014 წელს კონფლიქტის დიპლომატიური გზით დარეგულირების მცდელობას. კითხვაზე, როგორ შეიძლება დასრულდეს ომი უკრაინაში, მერკელმა უპასუხა, რომ მას არ სურს ამაზე კომენტარის გაკეთება. ამავე დროს, მან მოუწოდა მხარეებს, დაფიქრდნენ სცენარზე, რომელშიც შესაძლებელია მოლაპარაკებები.
