გასულ კვირაში ლარი მცირედით გაუფასურდა, მაგრამ კვირის ბოლოს დინამიკა შეიცვალა და ეროვნული ბანკის მიერ სავალუტო რეზერვებიდან $57 მილიონის გაყიდვის შედეგად, ლარმა გამყარება დაიწყო.
TBC Capital-ის შეფასებით, სავალუტო ბაზარზე აშშ დოლარის მიწოდების გარდა, ინტერვენციების საჯარო აუქციონის გზით ჩატარებას, ნეგატიური სენტიმენტების ერთგვარი საპირწონის დატვირთვაც ჰქონდა:
- მაშინ როდესაც, ტრადიციულად, სენტიმენტები ლარის კურსზე მნიშვნელოვან ზეგავლენას ახდენს, სავალუტო შემოდინებები ძლიერი რჩება და ეს აშშ დოლარის ჭარბი მიწოდების გაგრძელების არგუმენტია;
- გასულ ერთ წელიწადში ან მცირედით მეტ პერიოდში სებ-მა თითქმის $2 მილიარდი შეისყიდა, რომელიც შეგვიძლია ჭარბ მიწოდებად ჩავთვალოთ;
- ამდენად, ლარის კურსზე ნეგატიური ზეგავლენისათვის სამომავლოდ ამ მხრივ მკვეთრი ცვლილებაა საჭირო, რაც ჩვენ მიერ საბაზო სცენარად არ განიხილება;
- ლარის მიმდინარე საშუალო გაცვლითი კურსი თავის გრძელვადიან ტენდენციასთან ახლოსაა, რაც საქართველოს ძირითად სავაჭრო-ეკონომიკურ პარტნიორ ქვეყნებში მოსალოდნელზე საშუალოდ უფრო მაღალი ინფლაციის შედეგია;
- ნავთობის საერთაშორისო ფასების ბოლოდროინდელი გაძვირება, რუსეთის მიერ ნავთობპროდუქტების ექსპორტის შეზღუდვასთან ერთად, ინფლაციაზე ზეგავლენიდან გამომდინარე, ლარისათვის ახლო მომავალში შედარებით პოზიტიური ფაქტორია;
- ამ ზეგავლენის შედეგად ინფლაცია სამიზნეს მოსალოდნელზე უფრო მალე დაუბრუნდება, რაც, თავის მხრივ, ლარის დამატებითი გაუფასურების საწინააღმდეგო არგუმენტია;
- მთლიანობაში, ვფიქრობთ, რომ მომდევნო დაახლოებით 12 თვეში ჩვენი ადრინდელი, მცირედით, მაგრამ მაინც გაუფასურების საბაზო სცენარი, უფრო ნეიტრალურისაკენ იცვლება.