ბილეთების რეალიზაციის ბაზარზე ბოლო დროს დაპირისპირება გამწვავდა. ბილეთების რეალიზაციით დაკავებული კომპანიები ერთმანეთს წესების დარღვევით მოქმედებაში ადანაშაულებენ.
იანვარში ონლაინ პლატფორმა Biletebi.ge-მ თიბისი ბანკის შვილობილი TKT.ge კონკურენციის პირობების უხეშ დარღვევაში დაადანაშაულა. კომპანია აცხადებდა, რომ თიბისი ბანკი საკუთარი გავლენის გამოყენებით, TKT.ge-ს ექსკლუზიური კონტრაქტების მოპოვებაში ეხმარებოდა.
უფრო ადრე ეს კომპანიები ერთმანეთს Aerosmith-ის კონცერტის დროს გაყიდული ბილეთების გამო დაუპირისპირდნენ.
ამჯერად ბილეთების რეალიზატორმა კიდევ ერთმა კომპანიამ შპს ელ.ბილეთებმა კონკურენციის ეროვნულმა სააგენტოში საჩივარი შეიტანა და ბაზრის კვლევა მოითხოვა. საკითხი შეეხება კინოთეატრების ბილეთების ონლაინ რეალიზაციისას სავარაუდო კონკურენციის საწინააღმდეგო ქმედებებს.
სააგენტომ მოკვლევა ხუთი ეკონომიკური აგენტის მიმართ დაიწყო.
სააგენტოს ინფორმაციით, ერთი ეკონომიკური აგენტის მიმართ მოკვლევა დაიწყო დომინანტური მდგომარეობის ბოროტად გამოყენების სავარაუდო ფაქტზე. ხოლო კონკურენციის შემზღუდველი შეთანხმების სავარაუდო ფაქტებზე ხუთი ეკონომიკური აგენტის საქმიანობას იკვლევენ. დომინანტური მდგომარეობის ბოროტად გამოყენებას, სავარაუდოდ, სწორედ TKT.ge-ს ედავებიან.
ბილეთების პლატფორმა TKT.ge-ის საკონტროლო პაკეტის 55%-ს თიბისი ბანკი 2019 წლიდან ფლობს.
სააგენტო გადაწყვეტილებას მოკვლევის დაწყებიდან, არაუგვიანეს, 6 თვის ვადაში იღებს. თუმცა, საკითხის მნიშვნელობისა და სირთულის გათვალისწინებით, მოკვლევის პროცესი შეიძლება 18 თვემდე გაგრძელდეს.
