კონკურენციის ეროვნულმა სააგენტომ მოკვლევა ოთხი ფარმაცევტული კომპანიის მიმართ დაიწყო. სააგენტოს ინფორმაციით, საკითხი ეხება ბოლო პერიოდში, ქრონიკული და ონკოლოგიური მედიკამენტების იმპორტიორი, რეალიზატორი კომპანიების მხრიდან ფასების მკვეთრ ზრდას და სავარაუდო, იდენტური ფასწარმოქმნის დაწესებას.
კონკურენციის საწინააღმდეგო ქმედების დადგენის შემთხვევაში, კანონი ითვალისწინებს ჯარიმას, დამრღვევისთვის წინა ფინანსური წლის ბრუნვის 5%-მდე ოდენობით.
მოკვლევას საფუძვლად დაედო ჯანდაცვის სამინისტროს ინფორმაცია და განცხადებები, ფარმაცევტული კომპანიების ქმედებების კონკურენციის კანონმდებლობასთან თავსებადობასთან დაკავშირებით.
მოკვლევა ორი მიმართულებით დაიწყო, რაც დომინანტური მდგომარეობის შესაძლო ბოროტად გამოყენებასა და კონკურენციის შესაძლო შემზღუდველ შეთანხმებებს (ე.წ. კარტელური გარიგებები) გულისხმობს.
სააგენტო განმარტავს, რომ კომპანიებს, რომელთა მიმართ მოკვლევა მიმდინარეობს და, ასევე, ფარმაცევტულ ასოციაციებს, განსახილველ საკითხთან დაკავშირებით საშუალება ექნებათ პროცესში საკუთარი პოზიციები/ახსნა-განმარტებები წარმოადგინონ.
ფარმაცევტული ბაზრის მონიტორინგი კონკურენციის სააგენტომ 2022 წელსაც ჩაატარა. როგორც სააგენტო განმარტავს, კონკურენტული გარემოს გაუმჯობესების მიზნით, 13 რეკომენდაცია გასცა, რომლებიც აღსრულების პროცესშია. აქედან, სრულად ან ნაწილობრივ 7 რეკომენდაცია შესრულდა.
„ამავე პერიოდში, საქართველოს მთავრობის გადაწყვეტილებით, თურქეთის რესპუბლიკიდან მედიკამენტების პარალელური იმპორტის მექანიზმი ამოქმედდა. შედეგად, ხარისხიან მედიკამენტებზე ხელმისაწვდომობა გაიზარდა, ხოლო გაზრდილი ფინანსური ხელმისაწვდომობის შედეგად, საცალო ბაზარზე მომხმარებელმა, დაახლოებით 250 მილიონი ლარის დანაზოგი გააკეთა. რეფერენტული ფასწარმოქმნის და ბაზარზე განხორციელებული/მიმდინარე რეფორმის პირობებში მოსალოდნელია აღნიშნული მაჩვენებლის მნიშვნელოვანი ზრდა“, – ნათქვამია კონკურენციის სააგენტოს მიერ გავრცელებულ განცხადებაში.
ამ დროისთვის, სააგენტო მოკვლევის 4 საქმეს განიხილავს – შეთანხმებული ქმედების, დომინანტური მდგომარეობის ბოროტად გამოყენების, არაკეთილსინდისიერი კონკურენციის და ადმინისტრაციული უწყების მხრიდან, კონკურენციის შეზღუდვის სავარაუდო შემთხვევებს. 2023 წელს, უწყებამ ერთი მოკვლევა დაასრულა და ადმინისტრაციული უწყების მხრიდან კონკურენციის შეზღუდვის ფაქტი დაადგინა.
ინფორმაციისთვის: საქმის მოკვლევის დაწყებიდან არაუგვიანესკონკურენციის სააგენტო 6 თვის ვადაში სააგენტო შესაბამის გადაწყვეტილებას იღებს. საკითხის მნიშვნელობისა და სირთულის გათვალისწინებით, მოკვლევის პროცესი შეიძლება 18 თვემდე გაგრძელდეს.
