საკომუნიკაციო ბაზარზე მალე 5G ინტერნეტი ხელმისაწვდომი იქნება. კომუნიკაციების ეროვნული კომისია ინტერნეტ ბაზარზე 5G-ის დასანერგად აუქციონს უახლოეს მომავალში გამოაცხადებს და კომპანიებს სიხშირეების შეძენას შესთავაზებს. აუქციონის პირობებთან დაკავშირებით უკვე დაიწყო საჯარო კონსულტაციები.
საჯარო კონსულტაციების მიზანია, აუქციონის გამოცხადებამდე ყველა დაინტერესებულ პირს მიეცეს შესაძლებლობა, წარმოადგინოს საკუთარი მოსაზრებები.
მე-5 თაობის ინტერნეტის დასანერგად, აუქციონი 23 ლოტზე გამოცხადდება. აუქციონებზე კომისია 700, 3400-3700 და 2600 მეგაჰერცის დიაპაზონების სიხშირულ ზოლებს გამოიტანს. ასევე, დამატებით დაგეგმილია 800 მეგაჰერცის ზოლის გამოტანა.
5G – ეს არის უსადენო ახალი თაობის ინტერნეტტექნოლოგია, რომელიც უკვე არსებულ ტექნოლოგიებთან შედარებით, მნიშვნელოვნად გაზრდის მობილური ინტერნეტის სიჩქარეს. შეამცირებს დაყოვნებას და სრულიად ახალ საფეხურზე გადაიყვანს ჯანდაცვის, განათლების, ბიზნესის, სოფლის მეურნეობის, ინფრასტრუქტურისა და სხვა სექტორებს.
კომისია 5G-ის დანერგვას 2022 წლიდან აპირებდა. მაშინ ეს გადაწყვეტილება მობილურმა ოპერატორებმა ნაადრევად მიიჩნიეს და გადავადება მოითხოვეს.
2021 წლის ბოლოს, კომუნიკაციების კომისიის ინიციატივის გაცნობისას, მაგთის დამფუძნებელმა გია ჯოხთაბერიძემ განაცხადა, რომ კომპანიებს 5G-ის დასანერგად საკმარისი სახსრები არ ჰქონდათ და 2023-2024 წლისთვის იქნებოდნენ მზად.
რა მოეთხოვებათ კომპანიებს, რომლებიც 5G-ისთვის საჭირო სიხშირე ექნებათ
კომპანიებმა, რომლებიც 5G-ის დანერგვისთვის საჭირო სიხშირეს მოიპოვებენ, ქსელის განვითარებასთან ერთად, მობილური ვირტუალური ოპერატორი – MVNO საკუთარ ქსელზე უნდა დაუშვან. კერძოდ, ლიცენზიის მფლობელი ვალდებული იქნება აწარმოოს მოლაპარაკებები შესაბამის ქსელზე დაშვების ყველა მსურველ MVNO ოპერატორთან, სამართლიანი და არადისკრიმინაციული პირობებით. ეს 5G სიხშირის მოსაპოვებლად ყველა ლოტზე აუცილებელი წინაპირობაა.
ოპერატორები, რომლებიც მოიპოვებენ მოცემულ სიხშირეებს, ვალდებული იქნებიან 5G ქსელით ეტაპობრივად დაფარონ საქართველოს მჭიდროდ დასახლებული პუნქტები, ტურისტული ზონები, პორტები, აეროპორტები, რკინიგზა და ძირითადი საავტომობილო გზები შემდგომი 3-7 წლის განმავლობაში.
2600 და 3600 მეგაჰერცის სიხშირეები უზრუნველყოფს ინტერნეტის სიჩქარის რამდენჯერმე გაზრდას მსხვილ დასახლებულ პუნქტებში. ხოლო 700 და 800 მეგაჰერცის სიხშირეები ძირითადად გამოყენებული იქნება მოსახლეობის ნაკლები სიმჭიდროვის მქონე დიდი სივრცეების დასაფარად.
რა ეღირება 5G სიხშირე
კომუნიკაციების კომისიის მიერ გამოცხადდება ოთხი აუქციონი ოთხ კომბინირებულ აბსტრაქტულ ლოტზე, რომლებიც ერთმანეთისგან დაფარვის ვალდებულებებით და ფასით განსხვავდებიან. ოთხივე კომბინირებული აბსტრაქტული ლოტი სიხშირული სპექტრის ორი განსხვავებული დიაპაზონის ზოლებისგან შედგება და დასახლებული პუნქტების დაფარვის სხვადასხვა ვალდებულებას ითვალისწინებს, რაც შესაბამისად განაპირობებს რადიოსიხშირული რესურსით სარგებლობის განსხვავებულ საწყის საფასურს. პირველი კომბინირებული ლოტის საწყისი საფასური 4 984 000 ლარი იქნება, მე-2 კომბინირებული ლოტის – 2 530 900 ლარი, მე-3 კომბინირებული ლოტის – 2 593 800 ლარი, მე-4 კომბინირებული ლოტის კი – 2 656 700 ლარი.
გარდა 4 კომბინირებული ლოტისა, აუქციონი დამატებით კიდევ ცალკე მდგომ 19 ლოტზე გამოცხადდება. ყველა ლოტის ფასი განსხვავებულია სიხშირული სპექტრის დიაპაზონისა და ზოლის სიგანის მიხედვით. ცალკე მდგომ ლოტებზე აუქციონებში მონაწილეობის უფლება ექნება მხოლოდ იმ პირს, რომელიც გამოცხადდება გამარჯვებულად კომბინირებულ ლოტებზე გამოცხადებული აუქციონებიდან ერთ-ერთში მაინც.
კომუნიკაციების კომისიის განმარტებით, მათ ევროკომისიის რეკომენდაციით, რადიოსიხშირული სპექტრით სარგებლობის საფასური შეამცირეს.
სიხშირული რესურსის საფასური კი ე.წ. დიდ ოთხეულში შემავალ კომპანია
Ernst & Young-ის ექსპერტებთან ერთად შეიმუშავა.
