კომპანიებს შეუძლიათ მიიღონ ფინანსური დახმარება გადამამუშავებელი საწარმოების გასახსნელად

საქართველოს სოფლის განვითარების სააგენტომ (RDA), გადამამუშავებელი საწარმოების განვითარებისთვის ფინანსური დახმარების პროგრამის მორიგი ეტაპი დაიწყო. თანადაფინანსების მსურველი მწარმოებლებისგან განაცხადების მიღება 3 აპრილს დაიწყო და 15 აპრილის 23:59 საათის ჩათვლით გაგრძელდება. 

სოფლის მეურნეობის პროდუქტების გადამამუშავებელი და შემნახველი საწარმოების თანადაფინანსების პროექტში მონაწილეობისთვის განაცხადები მიიღება მხოლოდ საქართველოს იურიდიული პირებისგან, მათ შორის სასოფლო-სამეურნეო კოოპერატივებიდან.

საწარმოების საქმიანობის სფეროებია: ხილის, კენკრის, ციტრუსოვანი ხილის, ბოსტნეულის, კაკლის, მიწის თხილისა და სხვა კაკლოვანი კულტურების (თხილის გარდა), მარცვლეულის (გარდა ხორბლის ფქვილის წარმოების), დაფნის, ჩაის, თამბაქოს, თაფლის და ფუტკრის სხვა პროდუქტები, სანელებლების, ეთერზეთების, ღვინის და სხვა ალკოჰოლური სასმელების წარმოება (გარდა ღვინის წარმოებისა კახეთის რეგიონში) და ა.შ. აღსანიშნავია, რომ ამ სიაში არ შედის ძროხის რძის, ასევე თევზის გადამუშავება. RDA-ს ინფორმაციით, აღნიშნული გადაწყვეტილება ქვეყანაში ამ ეტაპზე შესაბამისი პირველადი ნედლეულის საკმარისი რაოდენობის არარსებობით არის განპირობებული.

ფინანსური დახმარება ითვალისწინებს:

• პროექტის ჯამური ღირებულების თანადაფინანსებას არაუმეტეს 40%, მაგრამ არაუმეტეს 500 000 ლარისა;

• შეღავათიან კრედიტს/ლიზინგს – არაუმეტეს 1 500 000 ლარისა.

წარმოდგენილი პროექტის ჯამური ღირებულება უნდა შეადგენდეს არაუმეტეს 250 000 ლარს.

პოტენციური ბენეფიციარის თანამონაწილეობას შეიძლება წარმოადგენდეს საკუთარი სახსრები ან კრედიტი (მათ შორის შეღავათიანი აგროკრედიტი/ლიზინგი).

სესხის ან ლიზინგით სარგებლობის შემთხვევაში, ბენეფიციარს უნდა ჰქონდეს დამტკიცებული სესხი ან ლიზინგი.

პროექტები, რომლებიც განხორციელდება მაღალმთიანი დასახლებებისა და გამყოფი ხაზის მიმდებარე სოფლებში ან/და რომელსაც განახორციელებს სასოფლო-სამეურნეო კოოპერატივი, თანადაფინანსება განისაზღვრება პროექტის ჯამური ღირებულების არაუმეტეს 50%-ით, არაუმეტეს 500 000 ლარისა.

თანადაფინანსება გაიცემა მხოლოდ ძირითადი საშუალებების შესაძენად ან შესაქმნელად, მათ შორის შესაძლებელია, იყოს საწარმოს სპეც. ტექნიკითა და წარმოების შესაბამისი კომუნიკაციებით უზრუნველყოფა.

კომპონენტი არ ითვალისწინებს ავტოსატრანსპორტო საშუალებების თანადაფინანსებას.

თანადაფინანსება არ გამოიყენება:

• საწარმოს საბრუნავი სახსრების, მათ შორის, საოპერაციო ხარჯების დასაფინანსებლად;

• მიწის ნაკვეთის შესაძენად;

• შენობა-ნაგებობების შესაძენად, გარდა იმ შემთხვევებისა,როცა შეძენა ხორციელდება სსიპ სახელმწიფო ქონების ეროვნული სააგენტოსაგან, მუნიციპალიტეტებისაგან, აჭარის ავტონომიური რესპუბლიკის აღმასრულებელი ხელისუფლების შესაბამისი ორგანოსაგან, სახელმწიფო ან მასთან აფილირებული საწარმოებისაგან.

https://rda.gov.ge/programs/695674-gadamamushavebeli-da-shemnakhveli-satsarmoebis-tanadaphinansebis-proeqti/9c2a5a69-b88b-43e2-80a2-f8c65289cceb