ფინანსთა სამინისტროს შემოსავლების სამსახურის მონაცემებით, 2023 წელს საქართველოდან ექსპორტზე 9,492 კგ-ის, $1,365 მილიონის ღირებულების კატალიზატორები გაიტანეს. შემოსავლების სამსახურს კატალიზატორების ექსპორტის შესახებ მონაცემებისთვის დეპუტატმა მიხეილ დაუშვილმა მიმართა.
როგორც სტატისტიკა აჩვენებს, ქვეყნიდან რეკორდული რაოდენობის კატალიზატორი 2021 წელს გავიდა – $31 მილიონის ღირებულების. ავტომობილის კატალიზატორების ექსპორტის მაჩვენებელი მაღალი იყო 2020 წელსაც – $16.9 მილიონის მოცულობით.
ბოლო 9 წლის განმავლობაში საქართველოდან უცხოეთში სულ $97,8 მილიონის ღირებულების ავტომობილის კატალიზატორია გასული. სულ ჯამში 701,441 კგ-ის. ოფიციალური მონაცემები აჩვენებს, რომ კილოგრამის ფასი ბოლო წლების განმავლობაში მცირდება და 2023 წელს საშუალოდ $143-ს შეადგენს.
საქართველოდან კატალიზატორების ექსპორტი წლების მიხედვით:
● 2015 – $6,297 მილიონი (92,122 კგ)
● 2016 – $3,595 მილიონი (60,505 კგ)
● 2017 – $3,655 მილიონი (61,579 კგ)
● 2018 – $7,292 მილიონი (89,672 კგ)
● 2019 – $11,710 მილიონი (111,190კგ)
● 2020 – $16,794 მილიონი (86,999 კგ)
● 2021 – $31,083 მილიონი (122,092 კგ); კგ-$254
● 2022 – $15,986 მილიონი (67,790 კგ); კგ-$235
● 2023 – $1,365 მილიონი (9,492 კგ); კგ-$143
კატალიზატორების შეგროვება ქვეყანაში იმპორტირებული მეორადი ავტომობილებისგან დაშლის შედეგად ხდება ან მას მფლობელები ხსნიან, მისი შემდგომი რეალიზაციის მიზნით.
კატალიზატორი ავტომობილის საკმაოდ ძვირად ღირებული ნაწილია. ის შეიცავს პალადიუმს, რომელიც პლატინის ჯგუფის ძვირფასი ლითონია და გამონაბოლქვს ამცირებს. მის შემადგენლობაში ასევე, არის რადიუმი და პლატინა.
ავტომობილების ემისიების და გარემოს დაბინძურების შემცირების მიზნით, მთავრობა კანონმდებლობაში ცვლილებებს ამზადებს იმისთვის, რომ კატალიზატორების მოხსნა და მათი შემდგომი გასხვისება შეიზღუდოს.
