Adidas-ს წაგების წელი აქვს. პირველი კვარტალი ნეგატიურად დაიწყო და $33 მილიონის ზარალით დასრულდა, დიდწილად, რეპერ კანიე უესტთან, იგივე Ye-სთან განხეთქილების გამო, რაც სოციალურ მედიაში რეპერის ანტისემიტურ გამოსვლებსა და შეურაცხმყოფელ კომენტარებს მოჰყვა.
კომპანიის ფინანსური მაჩვენებლები მკვეთრად გაუარესდა შარშანდელთან შედარებით, როცა მან €490 მილიონის მოგება მიიღო.
ამერიკელ რეპერთან კონტრაქტის გაწყვეტა Adidas-ს €600 მილიონის დანაკლისად დაუჯდა.
უესტთან დაშორების გამო Adidas-ს €1,2 მილიარდის ღირებულების Yeezy-ის კოლექცია ჯერ კიდევ გასაყიდი აქვს.
Adidas-მა ჯერ ვერ გადაწყვიტა, რა მოუხერხოს Yeezy-ის მოდელს, რომელიც კანიე უესტთან თანამშრომლობით შეიქმნა.
თუ მოდელს გაყიდიან, ჰონორარი რეპერს უნდა გადაუხადონ, რაც კომპანიას არ სურს. Adidas-ის ხელმძღვანელობა ამბობს, რომ თუ სპორტულ ფეხსაცმელს გაჭირვებულებს მისცემენ, მათ შეიძლება, ფეხსაცმელი მაღალ ფასად გადაყიდონ, რაც კომპანიის ინტერესში ასევე არ არის.
თუ Yeezy-ის მთელ კოლექციას ჩამოწერენ, კომპანიამ შესაძლოა, €700 მილიონი საოპერაციო ზარალი განიცადოს.
Adidas-ის მენეჯმენტი 2023-ს გარდამავალ წელს უწოდებს და იმედოვნებს, რომ 2024-2025 უკეთესი იქნება.
