მიწის მორწყვის საფასური სავარაუდოდ, მოიმატებს
საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ ირიგაციის ახალი ტარიფები 2023 წლის ბოლომდე უნდა დაადგინოს. ახალი ტარიფები, სავარაუდოდ, გამოიწვევს სასოფლო-სამეურნეო მიწების მორწყვის საფასურის გაზრდასაც. რამდენით მოიმატებს ტარიფი, ამას, მარეგულირებელი კომისია ჯერ ვერ ამბობს.
აღსანიშნავია, რომ ბოლო საქართველოში 2011 წლის შემდეგ ტარიფების გადახედვა არ მომხდარა. ახალი საფასურის დადგენამდე შემუშავდება ახალი სატარიფო მეთოდოლოგია.
სემეკ-ის წყალმომარაგების დეპარტამენტის დირექტორის გიგა ნადირაძის თქმით, ტარიფი იქნება როგორც ჰექტარზე ფიქსირებული, ასევე, ცვლადი მ^3-ზე. ტარიფები დაუდგინდება არაპროფილურ მომხმარებლებსაც.
ამჟამად, საქართველოში მორწყვის ტარიფი ჰექტარზე 75 ლარს შეადგენს. დაშრობაზე/დრენაჟზე ტარიფი 40 ლარია. ხოლო წყლის მოცულობაზე, ერთ მ^3 წყალზე კომპანიას არ აქვს დადგენილი ტარიფი.
სემეკ-ის განმარტებით, ახალი ტარიფებით უნდა მოხერხდეს საქართველოს მელიორაციის კომპანიის ხარჯის 100%ით დაფარვა და ამავდროულად, წყლის რესურსის რაციონალური გამოყენება. კომპანია ამჟამად არსებული ტარიფებით წყლის ხარჯის მხოლოდ 20%-ს ფარავს.
საქართველოში სარწყავი ფართი სულ 130 000 ჰექტარს შეადგენს. მელიორაციის კომპანიის მომხმარებლები არიან 100 ზე მეტი თევზის მეურნეობა, 20 ჰიდროელექტროსადგური და 94 სხვადასხვა საწარმო, რომელიც ტექნიკურ წყალს მოიხმარს. სემეკ-ის მონაცემებით, საერთო ფართიდან ამჟამად ფაქტობრივად ირწყვება 70 000 ჰექტარი.
