საქართველოს პრემიერ-მინისტრი ირაკლი ღარიბაშვილი რესპუბლიკური საავადმყოფოს თანამშრომლებს სამსახურის შენარჩუნებას დაჰპირდა.
პრემიერ-მინისტრის თქმით, რესპუბლიკური საავადმყოფოს ადგილას ახალი საავადმყოფო აშენდება და არცერთი თანამშრომელი უსამსახუროდ არ დარჩება.
„ბოლო დღეებში ბევრი კითხვა დაისვა, თუ რა გეგმა აქვს სახელმწიფოს რესპუბლიკურ საავადმყოფოსთან დაკავშირებით. რამდენიმე დღეში ზურაბ აზარაშვილი წარმოადგენს ახალ ხედვას, პრეზენტაციას. ძალიან ბევრი არასწორი ინფორმაცია ვრცელდებოდა ბოლო დღეების განმავლობაში, მიზანმიმართული ტყუილი, პროპაგანდა მიმდინარეობდა, რაც, რა თქმა უნდა, არის სიცრუე – არც ერთი თანამშრომელი არ დარჩება სამსახურისა და ხელფასის გარეშე. გვაქვს ძალიან კარგი ხედვა, თუ როგორ უნდა განვითარდეს რესპუბლიკური საავადმყოფო, საუბარია იმავე ადგილზე ახალი საავადმყოფოს მშენებლობაზე და, რა თქმა უნდა, შევინარჩუნებთ ყველა თანამშრომელს. მღელვარების საფუძველი არ გვაქვს“, – განაცხადა ირაკლი ღარიბაშვილმა.
ყიფშიძის სახელობის ცენტრალური საუნივერსიტეტო კლინიკის შენობაში საპროტესტო აქცია დილიდან მიმდინარეობს. ათეულობით მედიკოსი ხელმძღვანელი პირების გადადგომას ითხოვს.
რესპუბლიკური საავადმყოფოს თანამშრომლები აცხადებენ, რომ სურთ სამინისტროსგან მოისმინონ კონკრეტული გეგმა, როგორ უნდა მოხდეს რესპუბლიკური საავადმყოფოს რეაბილიტაცია, რა გადაწყვეტილება იქნება მიღებული პერსონალის მიმართ.
რესპუბლიკური საავადმყოფოს დანგრევის შესახებ ჯანდაცვის მინისტრმა ზურაბ აზარაშვილმა დაახლოებით ერთი თვის წინ განაცხადა.მისი თქმით, საავადმყოფოს ადგილზე ახალი თანამედროვე სტანდარტების კლინიკა დაახლოებით 2-2,5 წელში აშენდება.
