აშშ-ის სახაზინო მდივანი ჯანეტ იელენი ამბობს, რომ მისმა დეპარტამენტმა თითქმის ამოწურა რესურსი, რომელსაც თვეების განმავლობაში დეფოლტის თავიდან ასაცილებლად იყენებდა.
„ჩვენ ვერ შევძლებთ მთავრობის ყველა ვალდებულების შესრულებას 1-ელ ივნისამდეც, თუ კონგრესი მანამდე სახელმწიფო ვალის ლიმიტს არ გაზრდის,“ – განაცხადა იელენმა.
მისი თქმით, უკვე რამდენიმე თვეა ფინანსთა სამინისტრო საგანგებო ზომებს იყენებს, მაგრამ მალე ამის შესაძლებლობაც ამოიწურება.
მან გააფრთხილა კონგრესი, რომ თუ ვალის პრობლემა ვერ გადაიჭრა, ამან შესაძლოა, „კონსტიტუციური კრიზისი“ გამოიწვიოს, რაც შემდეგ ფინანსურ ბაზრებზეც გავრცელდება.
როგორც ცნობილია, გადაუდებელ შემთხვევებში აშშ-ის პრეზიდენტს შეუძლია, მე-14 შესწორებით მინიჭებული უფლებამოსილება გამოიყენოს და კონგრესის გვერდის ავლით სახელმწიფო ვალის ლიმიტი გაზარდოს. თუმცა, იელენი ამბობს, რომ ეს იქნება კონსტიტუციური კრიზისი და კონგრესმა საქმე აქამდე არ უნდა მიიყვანოს.
„მნიშვნელოვანია, რომ კონგრესის წევრებმა გააცნობიერონ მათი პასუხისმგებლობა“ – დასძინა მან.
იანვარში შეერთებულმა შტატებმა სესხის ლიმიტი $31,46 ტრილიონამდე გაზარდა, რის შემდეგ, აშშ-ის ხაზინამ „რიგგარეშე ზომების“ დაწყების შესახებ გამოაცხადა, რათა თავიდან აეცილებინა ვალის გადაუხდელობა.
შემდეგ იელენმ გადაწყვიტა, რომ ხაზინა, პირველ რიგში, ფულს გადაუდებელი საჭიროებებისთვის დახარჯავდა, ანუ სერვისებისთვის, რომლებიც საჭირო იყო მთავრობის ფუნქციონირების შესანარჩუნებლად.
დღეს, 9 მაისს, თეთრ სახლში ჯო ბაიდენთან ერთად ვალის „ჭერის“ შესახებ კანონპროექტი უნდა განიხილონ. მაგრამ სპეციალისტები მოლაპარაკების შედეგებთან დაკავშირებით ოპტიმისტურ პროგნოზს ვერ აკეთებენ.
