არჩევნების შედეგების გამოცხადებისთანავე თურქული ლირა 0,5%-ით დაეცა და აშშ დოლართან მიმართებაში 19,70 ნიშნულზე ჩამოვიდა, რაც რეკორდულად დაბალი მაჩვენებელია.
სტამბოლის საფონდო ბირჟაზე აქციების მკვეთრი ვარდნის გამო, ვაჭრობა მცირე ხნით შეწყდა.
პრეზიდენტმა ერდოღანმა არჩევნებში მოსალოდნელზე უკეთესი შედეგი აჩვენა, რამაც ინვესტორების შეშფოთება გამოიწვია. ისინი იმედოვნებენ, რომ ოპოზიციური ლიდერის ქილიჩდაროღლუს, გამარჯვების შემთხვევაში, თურქეთი ეკონომიკურ პოლიტიკას შეცვლის და ინფლაციის პრობლემის მოგვარების უფრო სანდო მეთოდებზე გადავა.
პირველი ტურის შემდეგ, სადაც კანდიდატებმა 50%-იანი ბარიერი ვერ გადალახეს, ოპოზიციის გამარჯვება ნაკლებად სავარაუდო გახდა და ამან ინვესტორების იმედგაცრუება გამოიწვია.
საკრედიტო სარეიტინგო სააგენტო Moody’s-მა ორშაბათს განაცხადა, რომ ოპოზიციის გამარჯვება გააუმჯობესებს თურქეთის ეკონომიკურ პერსპექტივებს და დასძინა, რომ თურქეთის ეკონომიკის არასტაბილურობის რისკი „მნიშვნელოვანია“.
სააგენტოს შეფასებით, ერდოღანის გამარჯვება, უარყოფითად იმოქმედებს თურქეთის მაკროეკონომიკურ სტაბილურობასა და ფინანსური ბაზრებზე.
2021 წლის ბოლოს, როდესაც გლობალურმა ინფლაციამ მოიმატა, ერდოღანმა თურქეთის ცენტრალურ ბანკს უბრძანა, შეემცირებინა საპროცენტო განაკვეთები.
თურქეთის სტატისტიკური ინსტიტუტის მონაცემებით, თურქეთში წლიური ინფლაცია ოქტომბერში 85%-მდე გაიზარდა, აპრილში კი 44%-მდე ჩამოვიდა.
