28 მაისის შემდეგ, როცა თურქეთმა რეჯეფ თაიფ ერდოღანი პრეზიდენტად ხელახლა აირჩია, თურქული ლირა აშშ დოლარის მიმართ 7%-ით გაუფასურდა და ამჟამად აშშ დოლარი 24 ლირა ღირს.
წლის დასაწყისიდან თურქულმა ვალუტამ ღირებულების 19%-ზე მეტი დაკარგა.
ერდოღანის მიერ გასულ კვირას ახალი მთავრობის შემადგენლობის წარდგენის შემდეგაც ლირამ კიდევ უფრო მკვეთრად დაიწყო გაუფასურება, რაც ინვესტორების ნეგატიურ მოლოდინებთან არის დაკავშირებული.
ფინანსთა ახალმა მინისტრმა მეჰმედ შიშმეკმა, რომელიც ადრე პრემიერ-მინისტრის პოსტს იკავებდა, განაცხადა, რომ ქვეყნის ეკონომიკური პოლიტიკა რაციონალურ საფუძვლებს უნდა დაუბრუნდეს. იგულისხმება ერდოღანის მიერ 2023 წელს საპროცენტო განაკვეთების შემცირება. თურქეთის პრეზიდენტი პირდაპირ ჩაერია სავალუტო ბაზრებზე და, ლირას კურსის ხელოვნურად დასტაბილურების მიზნით, მილიარდობით დოლარის რეზერვების ინვესტირება განახორციელა.
ბანკირები ვარაუდობენ, რომ ლირას გაუფასურება მის რეალურ ღირებულებამდე საბაზრო პირობების გაუმჯობესებას გამოიწვევს.
ექსპერტების შეფასებით, ლირა თანდათან უახლოვდება იმ დონეს, რომლის დაცვაც სავალუტო რეზერვებით არ იქნება საჭირო.
Goldman Sachs-ის პროგნოზით, წლის ბოლომდე დოლარის გაცვლითი კურსი 28 ლირას მიაღწევს, ნეგატიური სცენარით კი შესაძლოა, 35 ლირამდეც დაეცეს.
