თურქულმა სახელმწიფო კომპანია Turkish Petroleum Corp.-მა განაცხადა, რომ მომავალ ხუთშაბათს შავ ზღვაში, საკარიას საბადოდან ბუნებრივი აირის მოპოვებას დაიწყებს. ამის შესახებ Financial Times-ს კომპანიის ხელმძღვანელმა მელიჰ ბილგინმა განუცხადა.
მისივე თქმით, მოპოვება ამჯერად სამი ჭაბურღილიდან მოხდება.
სექტემბერში კიდევ შვიდის ჭაბურღილის ექსპლუატაცია იგეგმება. ჯამში 10 ჭაბურღილიდან ამოღებული აირის მოცულობა დღეში 10 მილიონ კუბ. მეტრამდე იქნება, რაც თურქეთის მოხმარების დაახლოებით 7%-ია.
Turkish Petroleum-ის ხელმძღვანელის თქმით, სრულად ამოქმედების შემდეგ, საბადოდან დღეში 40 მილიონ კუბ. მეტრ გაზს ამოიღებენ და ამ აირის ნაწილი ექსპორტზე გავა.
როგორც ცნობილია, თურქეთმა აპრილის დასაწყისში დაასრულა მილსადენის მშენებლობა, რომლითაც საკარიას საბადოდან აირი შავ ზღვაში არსებულ გაზის მიმღებ პუნქტამდე მივა.
„მყიდველების პოვნა ჩვენთვის პრობლემას არ წარმოადგენს“, –განაცხადა Turkish Petroleum-ის ხელმძღვანელმა და ევროპული ბაზრის მაღალ პოტენციალზე მიუთითა.
თურქეთმა გასულ წელს $80 მილიარდის ენერგორესურსების იმპორტი განახორციელა, რაც მოიცავს ნავთობს, გაზსა და სხვა პროდუქტებს.
საკარიას საბადო 2020 წელს აღმოაჩინეს ამავე სახელწოდების პროვინციის სანაპიროსთან.
Turkish Petroleum-ის ინფორმაციით, შავ ზღვაში აღმოჩენილი ბუნებრივი აირის მარაგების უმეტესი ნაწილი საკარიას საბადოზე მოდის. საბადოში აირის მარაგმა შესაძლოა, 710 მილიარდ კუბ. მეტრს მიაღწიოს.
