თურქეთში არსებული კომერციული ბანკები უარს ამბობენ რუსულ ბანკებთან მუშაობაზე, ამის შესახებ რუსული მედია წერს ფინანსური ბაზრისა და საგარეო ვაჭრობის მონაწილეებზე დაყრდნობით.
თურქულმა ბანკებმა ანგარიშსწორების პროცესი კონტრაქტების ოფიციალურად დახურვის გარეშე შეაჩერეს.
გამოცემის წყაროს ინფორმაციით, ურთიერთობა ჯერ კიდევ 2023 წლის ზაფხულში გართულდა. სიტუაცია კიდევ უფრო გამწვავდა აშშ-ის პრეზიდენტის – ჯო ბაიდენის 22 დეკემბრის ბრძანების შემდეგ, რომელიც შეეხებოდა სანქციების დაკისრებას უცხოური კომპანიებისთვის, რომლებიც რუსეთს უკრაინის ომში ეხმარებიან.
Bloomberg-ის ინფორმაციით, რუსი კლიენტებისთვის შეზღუდვები ჩინეთის სახელმწიფო ბანკებმაც შემოიღეს, აშშ-ის სანქციების შიშით.
გამოცემა იტყობინება, რომ სულ მცირე ორმა ჩინურმა ბანკმა გადაწყვიტა, გადახედოს საკუთარ რუსულ ბიზნესს, გაწყვიტოს კავშირი სანქცირებულ კლიენტებთან და ასევე შეწყვიტოს ფინანსური მომსახურება რუსეთის სამხედრო ინდუსტრიისთვის.
Bloomberg-ის სტატიის საპასუხოდ კრემლში განაცხადეს, რომ რუსეთი აგრძელებს ჩინეთთან ორმხრივი პარტნიორული ურთიერთობების განვითარებას.
