ფარმაცევტული კომპანიების ასოციაციამ საკუთარ ფეისბუკზე გაავრცელა განცხადება, სადაც ნათქვამია, რომ გარკვეული მედიკამენტების მოწოდება თურქი მომწოდებლების მიზეზით შეიზღუდა.
ასოციაცია წერს, რომ შეფერხება მოხდა თურქი მომწოდებლების და არა ადგილობრივი კომპანიების მიზეზით. როგორც ასორტიმენტის, ასევე რაოდენობის მხრივ მოწოდების შეზღუდვა გარკვეული პერიოდის შემდგომ აისახება ადგილობრივ ბაზარზე.
ფარმაცევტული კომპანიების ასოციაცია შესაბამის მარეგულირებელ ინსტიტუტს მოუწოდებს, რომ „მოსახლეობისთვის მიწოდებული ეს ინფორმაცია არ იქნეს გამოყენებული მათი მხრიდან სექტორის უმიზეზო ბრალდებისთვის, როგორიცაა საბოტაჟი თუ ხელოვნური დეფიციტის შექმნა, რასაც სამწუხაროდ მრავალჯერ ჰქონდა ადგილი“.
ასოციაცია მოსახლეობას მიმართავს, გაგებით მოეკიდონ ამ პროცესს და მასში ფარმაცევტული კომპანიები არ დაადანაშაულონ.
მათი განცხადებით, თურქეთის ბაზრის გახსნასთან დაკავშირებული საკანონმდებლო ცვლილების ამოქმედებისთანავე, ფარმაცევტული კომპანიები ჩაერთნენ თურქეთიდან მედიკამენტების იმპორტის პროცესში და თურქული მედიკამენტებიც მალე გაჩნდა სააფთიაქო ქსელებში.
ასოციაციის განმარტებით, ფარმაცევტულ კომპანიებს, შესაბამისი კანონმდებლობით, აქვთ ინფორმაციის ჯანდაცვის სამინისტროსთვის გაზიარების ვალდებულება, მაგრამ სექტორისთვის არ იყო შემუშავებული და შეთავაზებული უნივერსალური პროგრამა.
ბიზნესის დაჟინებული მოთხოვნის მიუხედავად, მაკონტროლებლის მხრიდან უნივერსალური ტექნიკური ბაზა ამ პროცესების გამართულად ასამუშავებლად სათანადოდ არ არის უზრუნველყოფილი.
