აშშ-ის პრეზიდენტი ჯო ბაიდენი და პალატის სპიკერი კევინ მაკკარტი სახელმწიფო ვალის ლიმიტის გაზრდაზე შეთანხმდნენ მოსალოდნელ დეფოლტამდე რამდენიმე დღით ადრე.
ერთთვიანი რთული მოლაპარაკებების შემდეგ, აშშ-ის ვალის ლიმიტი $31,4 ტრილიონამდე გაიზრდება.
ბაიდენმა შეთანხმება შეაფასა, როგორც „მნიშვნელოვანი წინგადადგმული ნაბიჯი“, ამავე დროს, აღნიშნა, რომ ის არის კომპრომისული ვარიანტი.
„შეთანხმება არის კომპრომისული, რაც იმას ნიშნავს, რომ ყველა არ მიიღებს იმას, რაც სურს“, – თქვა ბაიდენმა.
შეთანხმების პროექტი ჯერ კიდევ იწერება კონგრესში წარსადგენად და დეტალები ჯერ არ არის გამოცხადებული.
სავარაუდოდ, ლიმიტის გაზრდის მიუხედავად, შეიზღუდება არათავდაცვითი ხარჯები 2025 წლის იანვრამდე და ამის შემდეგ მხოლოდ 1%-ით გაიზრდება.
პალატის სპიკერმა თავის მხრივ თქვა, რომ ახალი გადასახადები არ იქნება შემოღებული, კანონპროექტი შეამცირებს ხარჯებს და ითვალისწინებს რეფორმებს, რომლებიც ხალხს სიღარიბიდან ამოიყვანს.
მაკკარტიმ განაცხადა, რომ დასრულებულ კანონპროექტს კიდევ ერთხელ გადაამოწმებს, პრეზიდენტს კიდევ ერთხელ შეხვდება და ოთხშაბათს უყრიან კენჭს.
იმის მიუხედავად, რომ ბიუჯეტის ხარჯები იზღუდება, სამხედრო ბიუჯეტი სავარაუდოდ, დაახლოებით $885 მილიარდამდე გაიზრდება, რაც მიმდინარე ბიუჯეტით გათვალისწინებულ დაფინანსებაზე 11%-ით მეტია.
მოსალოდნელია, რომ კენჭისყრის პროცესი რთული იქნება, რადგან დემოკრატებსა და რესპუბლიკელებს ბიუჯეტის ხარჯვით ნაწილთან დაკავშირებით ორი უკიდურესად განსხვავებული დამოკიდებულება აქვთ. როგორც ცნობილია, რესპუბლიკელები ხარჯების შემცირებას, მათ შორის თავდაცვის ბიუჯეტის შეზღუდვას, ითხოვენ, რასაც დემოკრატები არ ეთანხმებიან.
თუ კანონპროექტს ქვედა პალატა მიიღებს, ის სენატში გადავა, სადაც არ არის გამორიცხული, მისი მიღება სხვა გამოწვევებმა შეაფერხოს.
