2023 წლის თებერვალში თბილისში სულ 3,383 ბინა გაიყიდა, რაც იანვრის თვესთან შედარებით,19%-ით არის გაზრდილი. ხოლო წლიურ ჭრილში გარიგებების რაოდენობამ 12%-ით მოიმატა. საცხოვრებელი უძრავი ქონების ანალიზი TBC Capital-მა ჩაატარა.
თებერვლის თვეში 3%-ით გაძვირდა საბინაო ფართის საშუალო გასაყიდი ფასი და კვადრატული მეტრის ფასი $1 136-ს გაუტოლდა. ხოლო წლიურად ზრდა 30%-ს აღემატება.
მთაწმინდასა და ვაკეში კვლავ ყველაზე მაღალი გასაყიდი ფასები დაფიქსირდა. ამ უბნებში კვადრატულის ფართის ფასი $1,800-ზე მაღალია. ყველა უბანში წლიურ ჭრილში ფასის მნიშვნელოვანი ზრდა შეინიშნება, როგორც ძველი, ასევე ახალი ბინების შემთხვევაში.
2023 წლის თებერვალში, გაყიდული ბინების რაოდენობის მიხედვით თბილისის უბნებს შორის ლიდერობდა დიდი დიღომი, რომელმაც პირველად, 2021 წლის აპრილის შემდეგ, გადაასწრო საბურთალოს. დიდი დიღომი ასევე გამოირჩევა ახალი ბინების გაყიდვების ყველაზე მაღალი დონით (222 ბინა), წინა წელთან შედარებით 8%-იანი ზრდით. საბურთალოზე კი ახალი ბინების გაყიდვების რაოდენობა წლიურ ჭრილში 33%-ით შემცირდა.
2023 წლის თებერვალში, წინა წელთან შედარებით, ახალი ბინების გაყიდვების ყველაზე მაღალი ზრდა დაფიქსირდა ნაძალადევში (+250%), დიდუბეში (+64%) და გლდანში (+37%).
