24 აპრილიდან თბილისის ქუჩები ინტენსიურად მოირეცხება და დასუფთავდება. ამის შესახებ თბილისის მერმა კახა კალაძემ ფეისბუკზე, ვიდეოჩართვის დროს ისაუბრა.
„ვფიქრობ, რომ ორშაბათიდან უკვე კარგი ამინდია, შეგვიძლია დავიწყოთ სამუშაოები, რომელიც მიზნად ისახავს ქუჩების მორეცხვას, დასუფთავებას და ამას უნდა მიეცეს სისტემატური ხასიათი.
განსაკუთრებით ზაფხულის ცხელ დღეებში ძალიან მნიშვნელოვანია ქუჩები ირწყვებოდეს, სუფთავდებოდეს. მე მხედველობაში მაქვს საავტომობილო გზები, ტროტუარები, ყველაფერი უნდა იყოს მაქსიმალურად მოწესრიგებული“, – თქვა კახა კალაძემ.
მერის ინფორმაციით, მოირეცხება 100-ზე მეტი ქუჩა, ყველა მნიშვნელოვანი პანდუსი, გამზირი, გზაგამყოფი. მისივე განმარტებით, საჭიროების შემთხვევაში მერია დახმარებას შინაგან საქმეთა სამინისტროს სთხოვს.
„თუ აუცილებლობა მოითხოვს, შეგვიძლია ვთხოვოთ შინაგან საქმეთა სამინისტროს, საგანგებო სიტუაციების მართვის სამსახური დაგვეხმარება. როგორც ყოველთვის, გვერდით გვიდგანან. მხედველობაში მაქვს სახანძრო მანქანები, რომლის მეშვეობითაც მაქსიმალურად ბევრ ქუჩაზე მოვახერხებთ დასუფთავების სამუშაოების წარმოებას“, – განაცხადა კახა კალაძემ.
თბილსერვის ჯგუფის ხელმძღვანელის – დავით ფაჩულიას განცხადებით, უკვე შეძენილია ახალი ტექნიკა, დაახლოებით, 15 ერთეული სპეცტექნიკა. შეძენილია კერხერებიც, რომლითაც მოხდება ქუჩების მორეცხვა.
„ყოველდღიურ რეჟიმში მოირეცხება ასზე მეტი ქუჩა, გზატკეცილები, პანდუსები, გვირაბები, ხიდები, ასევე, როგორც პირველი, ისე მეორე კატეგორიის ქუჩები. ეს არ იქნება ერთჯერადი, არამედ გაგრძელდება მთელი ზაფხულის განმავლობაში, ყოველდღიურად. სამუშაოები დაიწყება ღამით, 00:00 საათიდან და გაგრძელდება 07:30 საათამდე“, – განაცხადა დავით ფაჩულიამ.
