2019 წლიდან თაფლის საექსპორტო ღირებულება და ასევე თაფლის ექსპორტის მოცულობა საქართველოში სტაბილურად იზრდება.
2022 წელს, 2021 წელთან შედარებით, ექსპორტის ღირებულება 79%-ით, ხოლო ექსპორტის მოცულობა 49%-ით გაიზარდა, რაც მიუთითებს, რომ ექსპორტირებული თაფლის ფასი მნიშვნელოვნად გაზრდილია.
PMCG-ის მკვლევრები, რომლებმაც საქართველოს თაფლის ბაზარი შეისწავლეს, ვარაუდობენ, რომ ამის მიზეზი შეიძლება იყოს ქვეყანაში თაფლის ხარისხის გაუმჯობესება და ქართული თაფლის პოპულარიზაცია საერთაშორისო ბაზრებზე, განსაკუთრებით ევროკავშირში.
საერთაშორისო მოთხოვნის ზრდის გამო ქვეყანაში თაფლის მარაგი უკვე ამოწურულია, ამიტომ ქართველი მეფუტკრეები პროდუქციის ექსპორტს 2023 წლის მაისამდე ვერ განახორციელებენ.
ექსპორტის ფასი
ქართული თაფლის საექსპორტო ფასი ბოლო წლების განმავლობაში საკმაოდ ცვალებადი იყო.
ფასმა პიკს 2019 წელს მიაღწია, როცა კილოგრამი $8,8 ღირდა, ხოლო 2022 წელს $4,6-მდე შემცირდა (2022 წელს ფასი, 2021 წელთან შედარებით გაზრდილია). მკვლევრები ფასის ასეთ მაღალ ცვალებადობას იმ ქვეყნების განსხვავებებით ხსნიან, რომლებშიც სხვადასხვა წელს იყიდებოდა თაფლი.
2016-2020 წლებში საქართველოში თაფლის წარმოების საშუალო წლიური ზრდის ტემპი იყო 4%, ხოლო საშუალო წლიური წარმოება იმავე პერიოდში 2 400 ტონას უდრიდა.
2021 წელს თაფლის წარმოებამ, წინა წელთან შედარებით, მნიშვნელოვანი –16,7%-იანი კლება აჩვენა, რაც თაფლის ტკიპების გავრცელებით იყო გამოწვეული. მიუხედავად ამისა, უნდა აღინიშნოს, რომ თაფლის წარმოების განვითარება გრძელდება.
2021 წელს ევროკავშირის ქვეყნებში ქართული თაფლის ექსპორტის ზრდა შესამჩნევი გახდა. ვითარება კიდევ უფრო გაუმჯობესდა 2022 წელს, რადგან ტკიპების პრობლემა მოგვარდა და თაფლის წარმოება აღდგა.
