რამდენიმე დღეა ფარმაცევტულ ქსელში თურქეთიდან იმპორტირებული მედიკამენტების ნაწილზე ფასების ზრდა ფიქსირდება. გაძვირდა ის მედიკამენტებიც, რომლებისთვისაც, გასულ წელს, მთავრობის მიერ გატარებული რეფორმის ფარგლებში, განსაკუთრებული პირობები შეიქმნა. კერძოდ, მედიკამენტებზე ფასების შემცირების მიზნით, თურქეთიდან იმპორტირებული მედიკამენტების რეგისტრაციის მექანიზმი გამარტივდა.
ჯანდაცვის სამინისტრო აცხადებს, რომ ფასების ზრდა ხელოვნურად მოხდა.
„საქმე გვაქვს არაკეთილსინდისიერ მარკეტინგთან, რაც უნდა აღიკვეთოს,- განაცხადა ჯანდაცვის მინისტრის პირველმა მოადგილემ თამარ გაბუნიამ,- ჩვენთვის ძალიან შემაშფოთებელი იყო ის ფაქტი, რომ გასული რამდენიმე დღის განმავლობაში დაფიქსირდა ფარმაცევტულ დაწესებულებებში თურქეთიდან იმპორტირებულ გარკვეულ მედიკამენტებზე ფასების ზრდა. ჩვენი შეფასებით, ეს არის ხელოვნური ზრდა, რადგან ამ პირობებში სხვა განმარტება ამ ზრდას რეალურად არ აქვს. ძალიან მნიშვნელოვანია, რომ ჩვენ ასეთი ფაქტები ყველანაირად აღვკვეთოთ, ჯანდაცვის სამინისტრო გამოიყენებს საერთაშორისო გამოცდილებას და პარტნიორებთან თანამშრომლობას, ასევე სხვა უწყებებთან თანამშრომლობას იმისთვის, რომ ამ ტიპის არაკეთილსინდისიერი მარკეტინგი, ფასების ხელოვნური მატება, კონკურენციის ხელოვნურად დარღვეული ჯანსაღი წესები აღიკვეთოს,“ – განაცხადა გაბუნიამ.
წყარო: jandacva.ge
