ეროვნული ბანკი მომდევნო თვეებში ინფლაციის ზრდის რისკებს ხედავს. ამ შემთხვევაში ის მონეტარული პოლიტიკის გამკაცრებას ან ამჟამად არსებული მაღალი 8%-იანი განაკვეთის ხანგრძლივად შენარჩუნებას არ გამორიცხავს.
მისი შეფასებით, ქვეყანაში ფასების ზრდის რისკს ქმნის მაღალი გლობალური ეკონომიკური გაურკვევლობა. მიმდინარე მწვავე გეოპოლიტიკური ვითარება იწვევს მიწოდების ჯაჭვების შეფერხებებს და საერთაშორისო ტრანსპორტირების გართულებას. ამის ფონზე, საერთაშორისო ბაზრებზე ნავთობისა და სურსათის ფასების მოსალოდნელი ტენდენციების შესახებ გაურკვევლობა გაზრდილია, რაც საქართველოში იმპორტული საქონლის ინფლაციის ზრდის რისკებს ქმნის.
სებ-ის თანახმად, ინფლაციურ რისკებს შეიცავს ქვეყანაში არსებული მაღალი საკრედიტო აქტივობაც.
ამ რისკების გათვალისწინებით, ეროვნულმა ბანკმა დღევანდელ სხდომაზე მონეტარული პოლიტიკის განაკვეთი 8%-ზე დატოვა იმისათვის, რომ საშუალოვადიან პერიოდში ინფლაცია მის მიზნობრივ მაჩვენებელთან ახლოს შენარჩუნდეს.
ცნობისთვის, ეროვნული ბანკის ინფლაციის საპროგნოზო მაჩვენებელი 2024 წლისთვის 3%-ს შეადგენს.
„იმ შემთხვევაში, თუკი ინფლაციური რისკები არ რეალიზდება და ინფლაციური რისკების სიმწვავე შემსუბუქდება, ეროვნული ბანკი, ფრთხილი ბიჯებით, პოლიტიკის განაკვეთის მის ნეიტრალურ დონემდე შემცირებას განაგრძობს.
ხოლო იმ შემთხვევაში, თუ ინფლაციის მოლოდინებზე ზრდის მიმართულებით მოქმედი ფაქტორები კვლავ გამოიკვეთა, შესაძლოა, მონეტარული პოლიტიკის გამკაცრება ან მიმდინარე მკაცრი პოზიციის ხანგრძლივად შენარჩუნება გახდეს საჭირო”,- აღნიშნულია სებ-ის მონეტარული პოლიტიკის კომიტეტის ანგარიშში, რომელიც დღეს გამოქვეყნდა.
ორგანიზაცია „საზოგადოება და ბანკების” შეფასებით, ეროვნული ბანკის მიერ განაკვეთის 8%-ზე დატოვება წინასაარჩევნო პერიოდში გაზრდილ რისკებს და გაურკვევლობას უკავშირდება. ორგანიზაციის ხელმძღვანელის გიორგი კეპულაძის თქმით, ეროვნული ბანკი ცდილობს, დამატებით არ გაზარდოს ზეწოლა გაცვლით კურსზე და ინფლაციაზე.
