„თუ რაიმე პარამეტრი მნიშვნელოვნად არ გაუარესდა, ელექტროენერგიაზე და გაზზე ტარიფი არ გაიზრდება“, – ამის შესახებ ენერგეტიკისა და წყალმომარაგების მარეგულირებელი ეროვნული კომისიის თავმჯდომარემ დავით ნარმანიამ განაცხადა.
„გადავხედეთ ელექტროენერგიის სექტორში მოქმედ ტარიფებს და მინიმუმ ამ წელს და მომდევნო წელსაც, მისი ზრდა არ გველოდება“, – განმარტა მარეგულირებელი კომისიის თავმჯდომარემ.
მისი თქმით, ბაზარზე ფასის შენარჩუნებას იმანაც შეუწყო ხელი, რომ ზამთრის სეზონზე საქართველომ მეზობელი ქვეყნებიდან ელექტროენერგიის მინიმალური იმპორტი განახორციელა. თურქეთში ელექტროენერგიის სიძვირის გამო, საქართველომ ამჯობინა, ადგილობრივი თბოსადგურების მიერ გამომუშავებული ელექტროენერგიის შეესყიდა.
„სისტემამ უფრო იაფად მიიღო თბოსადგურების გამომუშავებული ელექტროენერგია. ის ფასით სჯობდა თურქეთიდან იმპორტირებულს, სადაც კილოვატი ენერგიის ტარიფი მინიმუმ 20-21 ცენტია“, – აღნიშნა დავით ნარმანიამ.
