ევროკომისიის მიერ მიღებული გადაწყვეტილებით, უკრაინიდან ხორბლის, სიმინდის, მზესუმზირას თესლის და რაფსის იმპორტს დროებით, 5 მაისამდე, აჩერებს პოლონეთი, ბულგარეთი, უნგრეთი, სლოვაკეთი და რუმინეთი.
სამშაბათს, 2 მაისს, ევროკომისიამ, ხუთი ქვეყნის ზეწოლის შემდეგ, მიიღო დროებითი პრევენციული ზომები უკრაინიდან ოთხი დასახელების სასოფლო-სამეურნეო პროდუქციის იმპორტზე, რომლებიც ადგილობრივ ბაზარზე ფასების ვარდნაში უკრაინულ იმპორტს ადანაშაულებენ.
ევროკომისიის გადაწყვეტილებამ ჩაანაცვლა ამ ხუთი ქვეყნის მიერ უკრაინულ იმპორტზე უფრო ადრე დაწესებული ცალმხრივი აკრძალვები. ამასთან, მანამდე აკრძალული აგრარული პროდუქციის ჩამონათვალი გაცილებით ვრცელი იყო. მასში შედიოდა, რძის პროდუქტები, კენკრა, ფრინველის ხორცი და სხვა.
კვლავაც ნებადართული იქნება ამ ხუთი ქვეყნების გავლით უკრაინის პროდუქციის ტრანზიტი. უკრაინიდან საქონლის ექსპორტი შეუფერხებლად განხორციელდება მესამე ქვეყნებში.
პოლონეთმა, უნგრეთმა, ბულგარეთმა, რუმინეთმა და სლოვაკეთმა უკრაინული პროდუქციის იმპორტის დროებითი აკრძალვა აპრილის შუა რიცხვებში შემოიღეს.
უკრაინაში გააპროტესტეს ცალმხრივი აკრძალვების დაწესება და განაცხადეს, რომ იმპორტის შეჩერების გამო მეზობელი ქვეყნების მხრიდან სოლიდარობას ვერ გრძნობენ.
