სანქციებთან დაკავშირებით არსებული ხარვეზების გამო ევროკავშირი რუსული საწვავის უმსხვილეს იმპორტიორად რჩება.
ენერგეტიკისა და სუფთა ჰაერის კვლევის ცენტრმა (CREA) გამოავლინა ხუთი ქვეყანა, რომლებიც რუსულ ნავთობს ევროკავშირში ყიდიან. ეს ქვეყნებია – ჩინეთი, ინდოეთი, თურქეთი, არაბთა გაერთიანებული საამიროები და სინგაპური.
ეს ქვეყნები, უკრაინაში ომის დაწყების შემდეგ, რუსული ნავთობის წამყვანი იმპორტიორები გახდნენ და პარალელურად, გაზარდეს ევროპაში საწვავის შეტანა.
უკრაინის ომის დაწყებიდან ერთი წლის განმავლობაში, ევროკავშირმა, G7-ის ქვეყნებმა და ავსტრალიამ სულ €42 მილიარდის ნავთობპროდუქტების იმპორტი განახორციელეს. ომის შემდგომ წელს ევროკავშირში ნავთობის იმპორტმა €7,7 მილიარდი შეადგინა და, ამ მაჩვენებლით, ის რუსული ნავთობის იმპორტიორებს შორის პირველ ადგილზეა.
„რუსული ნედლი ნავთობის მთავარი შემსყიდველი ქვეყნებისგან, ნავთობპროდუქტების იმპორტის გაზრდა ძირს უთხრის რუსეთის წინააღმდეგ ნავთობის სანქციებს“, –აღნიშნავენ კვლევის ავტორები.
ისინი, ასევე მიუთითებენ, რომ ევროკავშირმა და G7-მა „ვერ შეძლეს ფასების ლიმიტის იმ დონემდე დაწევა, რომელიც რუსეთს ნავთობის ექსპორტიდან ზედმეტ მოგებას არ მოუტანდა“ და რომ, ევროკავშირის ქმედებები ამ მიმართულებით, არასაკმარისია.
რუსული ნედლი ნავთობის იმპორტი აზიისა და ახლო აღმოსავლეთის ხუთ ქვეყანაში 140%-ზე მეტით გაიზარდა წინა წელთან შედარებით და €74,8 მილიარდი შეადგინა. ამ ქვეყნებიდან ნავთობის ექსპორტი დასავლეთში გაიზარდა 80%-ით ღირებულების მიხედვით, ხოლო მოცულობის მიხედვით – 26%-ით.
თავის მხრივ, დასავლეთის ქვეყნებმა გაზარდეს რაფინირებული ნავთობის იმპორტი ჩინეთიდან 93%-ით, ინდოეთიდან – 2%-ით, თურქეთიდან –43%-ით, არაბეთის გაერთიანებული საემიროებიდან –23%-ით და სინგაპურიდან –33%-ით.
სანქციების მორიგი პაკეტი, რომლითაც ევროკავშირმა ემბარგო დაუწესა რუსულ დიზელს და ბენზინს, ძალაში მიმდინარე წლის თებერვალში შევიდა.
