დღეიდან, 15 მაისიდან, ძალაში შევიდა რუსეთის პრეზიდენტის – ვლადიმირ პუტინის ბრძანებულება საქართველოსთან სავიზო რეჟიმის გაუქმების შესახებ, რომელიც 2000 წლიდან მოქმედებდა. ახალი რეგულაციით, საქართველოს მოქალაქეებს რუსეთში უვიზოდ ყოფნა 90 დღით შეუძლიათ.
სავიზო რეჟიმის გაუქმებასთან ერთად, რუსეთის პრეზიდენტის გადაწყვეტილებით, გაუქმდა საქართველოსთან პირდაპირი ავიამიმოსვლის აკრძალვა, რომელიც 2019 წლის ზაფხულიდან მოქმედებდა. გადაწყვეტილება 10 მაისს შევიდა ძალაში და პირდაპირი ფრენები შესაძლოა, 16 მაისიდან დაიწყოს.
საქართველომ რუსეთთან დიპლომატიური ურთიერთობები 2008 წლის აგვისტოს ომის შემდეგ შეწყვიტა.
2012 წლიდან რუსეთის მოქალაქეებისთვის სავიზო რეჟიმი ცალმხრივად გაუქმდა. საქართველოსთან პირდაპირი ავიამიმოსვლა 2019 წლის ივნისში პუტინის განკარგულებით შეწყდა, თბილისში საპროტესტო გამოსვლების პასუხად, რაც რუსეთის დუმის დეპუტატ სერგეი გავრილოვის მიერ საქართველოს პარლამენტის თავმჯდომარის სკამის დაკავებას მოჰყვა. .
