ყოფილმა პრეზიდენტმა დონალდ ტრამპმა მანჰეტენის სასამართლო დატოვა, სადაც რამდენიმე საათის განმავლობაში, ფორმალურ პატიმრობაში იმყოფებოდა. ამერიკის ყოფილმა პრეზიდენტმა თავი უდანაშაულოდ ცნო 34-ვე პუნქტში, რომელიც ბრალად წაუყენეს.
მას სასამართლო დარბაზიდან გამოსვლისას განცხადება არ გაუკეთებია. სასამართლო დარბაზის დატოვების შემდეგ ტრამპი თავის ავტოკოლონაში ჩაჯდა და მანჰეტენიდან გაემგზავრა.
„არ ვარ დამნაშავე“, – ასე უპასუხა ტრამპმა ბრალდებას.
სასამართლოში მისვლისთანავე, ტრამპი ოფიციალურად დააკავეს და ბრალის წაყენებამდე ფორმალურად დააპატიმრეს. ტრამპს ხელბორკილები არ გაუკეთეს რადგან ის, ისედაც სამართალდამცავი ორგანოების მუდმივი მეთვალყურეობის ქვეშ იმყოფება.
ტრამპის ადვოკატებმა მოსამართლეს ნებისმიერი ვიდეო და ფოტო გადაღების და რადიო გადაცემების აკრძალვისკენ მოუწოდეს. ისინი ამტკიცებდნენ, რომ პროცესის გაშუქება გააუარესებდა „ისედაც თითქმის ცირკის მსგავს ატმოსფეროს“.
ყველა ბრალდება, რაც დონალდ ტრამპს წაუყენეს, ნიუ-იორკის კანონმდებლობით, ერთობლიობაში 136 წლით თავისუფლების აღკვეთას ითვალისწინებს. მაგრამ ყოფილი პრეზიდენტისთვის ფაქტობრივი სასჯელი, ბრალის დამტკიცების შემთხვევაში, რა თქმა უნდა, ბევრად ნაკლები იქნებოდა.
ტრამპს ედავებიან 2016 წელს, პორნოვარსკვლავ სტორმი დენიელსისთვის 130 ათასი დოლარის გადახდას, რის სანაცვლოდაც მას უნდა დაემალა, რომ 2006 წელს ტრამპთან ინტიმური ურთიერთობები ჰქონდა.
ტრამპი, რომელიც 2024 წლის საპრეზიდენტო არჩევნებში კენჭისყრას გეგმავს, მის წინააღმდეგ საქმის აღძვრას პოლიტიკურ დევნას უწოდებს.
