დიდი ბრიტანეთი ავრცელებს ინფორმაციას, რომ რუსეთის განახლებული თავდასხმის შემდეგ უკრაინის ჯარები იძულებულნი გახდნენ, დაეტოვებინათ ქალაქ ბახმუტის ზოგიერთი ნაწილი. ამგვარად, მოსკოვი ცდილობს, წინ წაიწიოს უკრაინის მოსალოდნელი კონტრშეტევის წინ.
უკრაინის ოფიციალური პირები აცხადებენ, რომ რუსეთი ფრონტის სხვა რაიონებიდან დამატებით ჯარებს აგზავნის ბახმუტში, რომლის ხელში ჩაგდებასაც მოსკოვი ცხრა თვის განმავლობაში ცდილობს.
ბრიტანეთის სამხედროებმა განაცხადეს, რომ ბოლო დღეებში რუსეთმა გააძლიერა თავდასხმა ბახმუტზე, რადგან რუსეთის თავდაცვის სამინისტროსა და ვაგნერის ძალებს შორის თანამშრომლობა გაუმჯობესდა. უკრაინის ძალებს მარაგების მხრივ მნიშვნელოვანი პრობლემები ექმნებათ, მაგრამ შეძლეს პოზიციებიდან მოწესრიგებულად გასვლა.
ბახმუტი, სადაც ომამდე დაახლოებით 70 ათასი ადამიანი ცხოვრობდა, რუსეთის შეტევების მთავარ სამიზნედ იქცა. ბრიტანელი სამხედროები აღნიშნავენ, რომ მსგავსი ინტენსივობის ბრძოლა ევროპაში მეორე მსოფლიო ომის შემდეგ არ ყოფილა.
