საქართველოს ყოფილი თავდაცვის მინისტრი და ტელეკომპანია ფორმულას საკონტროლო პაკეტის მფლობელი დავით კეზერაშვილი აცხადებს, რომ ე.წ. ქოლცენტრების საქმესთან არაფერი აკავშირებს. კეზერაშვილმა BBC-ზე გამოქვეყნებული საგამოძიებო სტატიის საპასუხო განცხადება გაავრცელა.
„აბსოლუტური პასუხისმგებლობით ვაცხადებ, რომ არასდროს მიმიღია მონაწილეობა მსგავს სქემებში, ამიტომ არ ვაპირებ, უყურადღებოდ დავტოვო ის ზიანი, რასაც ეს მასალა მე მაყენებს…” – აცხადებს კეზერაშვილი.
ამავე განცხადებაში წერია, რომ იგი გამოიყენებს ყველა სამართლებრივ მექანიზმს, რათა BBC-ის მიერ მოყვანილი ფაქტების უზუსტობა და სიმცდარე დაასაბუთოს.
„გამოვიყენებ ყველა სამართლებრივ ბერკეტს, რომ ბრიტანეთის საზოგადოებრივი მაუწყებლის პლატფორმაზე გასულ მასალაში ჩემთან დაკავშირებული როგორც ფაქტების უზუსტობა, ასევე მათი არასწორი ინტერპრეტაციის შედეგად მიღებული დაშვებების სიმცდარე დავადასტურო და ამას დიდი დრო არ დასჭირდება”, – წერს კეზერაშვილი ფეისბუკზე.
იგი ამბობს, რომ მზადაა ე.წ. ქოლცენტრების საქმეზე სამართალდამცავებთან ითანამშრომლოს.
„ყოველთვის გამოვთქვამდი მზადყოფნას და დღესაც მზად ვარ, ე.წ. ქოლცენტრების თემაზე ევროპული ქვეყნების საგამოძიებო სტრუქტურებთან თანამშრომლობისთვის, მით უმეტეს, რომ ჩემი, როგორც პოლიტიკურ დევნილობაში მყოფი პირის, საცხოვრებელი ადგილი სწორედ დიდი ბრიტანეთია, რომლის მართლმსაჯულების სისტემის სანდოობაში ეჭვი არავის ეპარება”, – წერს კეზერაშვილი.
დღეს, BBC-ის ვებგვერდზე გამოქვეყნდა მასალა ე.წ. ქოლცენტრებთან დაკავშირებით. ჟურნალისტური გამოძიების მიხედვით, თაღლითობის საქმესთან დავით კეზერაშვილიც არის დაკავშირებული.
