თავდაცვის ყოფილი მინისტრი და ფორმულას დამფუძნებელი დავით კეზერაშვილი აცხადებს, რომ ტელეკომპანიის წილის ნახევარს მის თანამშრომლებს გადასცემს. ხოლო ოლიგარქიული რეჟიმის დასრულების შემდეგ, მათ დარჩენილ წილსაც დაუთმობს.
„ვიღებ გადაწყვეტილებას, ჩემი დახმარების პარალელურად ტელეკომპანია „ფორმულას“ მივცე სრულიად ახალი და გამოცდილებით უნიკალური მედია-მოდელის შექმნის შესაძლებლობა, რომელიც კიდევ უფრო მაღლა აწევს მის სარედაქციო დამოუკიდებლობის თამასას, მათ შორი ჩემგანაც (რისი დეფიციტიც არხს არც ამ დრომდე ჰქონია).
გადაწყვეტილება ასეთია: მე უარს ვამბობ „ფორმულას“ საკონტროლო პაკეტზე და არსებული წილის ნახევარს ახლავე გადავცემ ტელეკომპანიის კოლექტივს. მას შემდეგ კი, რაც დასრულდება ოლიგარქიული მმართველობა, “ფორმულას” კოლექტივსავე სრულად გადავცემ ჩემს დარჩენილი წილსაც. ივანიშვილის ფაქტორის გაქრობისა და დასავლურ სივრცეში საბოლოოდ შესვლის შემდეგ, დარწმუნებული ვარ თავისუფალ მედიას ჩემი მონაწილეობის გარეშეც გაუჩნდება ბევრი სხვა საარსებო წყარო და აქ დაესმება წერტილი ჩემს აქტივობას მედიის მხარდაჭერის მიმართულებით და ზოგადად, ყველა ტიპის ჩართულობას ქართული პოლიტიკაში“, – წერია დავით კეზერაშვილის განცხადებაში.
იგი ამბობს, რომ „პროცესებიდან გასვლას“ არ განიხილავს, მის ირგვლივ შექმნილი მძიმე გარემოს მიუხედავად. რადგან საქართველოში დღეს რთული ვითარებაა და „სამოქალაქო საზოგადოება რუსულ ოლიგარქიულ რეჟიმთან ბრძოლის გადამწყვეტ ფაზაში შედის“.
დავით კეზერაშვილი ე.წ. ქოლცენტრების საქმეზე BBC-ის საგამოძიებო ფილმთან დაკავშირებით წერს, რომ მასში გავიდა არაერთი უზუსტობა და მათ გაბათილებას სასამართლოში შეეცდება.
„ინტერესის არსებობის პირობებში, მზად ვარ ვითანამშრომლო ევროპის ნებისმიერ საგამოძიებო უწყებასთან და მივაწოდო ჩემ ხელთ არსებული ინფორმაცია იმ მაღალჩინოსნებზე, რომლებიც რეალურად არიან ჩართულნი საქართველოში ე.წ. ქოლცენტრების ჰაბის მფარველობაში.
აქვე, ჩემთვის განსაკუთრებით იმ ადამიანების პოზიციაა გასაკვირი, ვინც უკვე დიდი ხანია, ზუსტად იცის ამ თაღლითური სქემის მუშაობაზე, მასში მეზობლების, ნათესავების ან შვილების ჩართულობაზე. გასაოცარია, რომ ეს ხალხი ახლა მორალს კითხულობს და მე მამუნათებს“, – აცხადებს კეზერაშვილი.
BBC-იმ 12 აპრილს გამოაქვეყნა სტატია ქოლცენტრების გლობალური ქსელის შესახებ. მალევე, ამ თემაზე ეთერში გავიდა თითქმის 50- წუთიანი საგამოძიებო ფილმი, სადაც თაღლითობის სქემასთან დავით კეზერაშვილის კავშირზეა საუბარი.
