დაანგრევენ თუ არა რესპუბლიკური საავადმყოფოს შენობას და რა ბედი ელის კლინიკის მედპერსონალს, ჯერ კიდევ გაურკვეველია.
საავადმყოფოს თანამშრომლები კვლავ აპროტესტებენ საავადმყოფოს დემონტაჟს. კლინიკასთან მათ დღესაც გამართეს აქცია, ლოზუნგით „რესპუბლიკური ჩვენი სახლია“.
აქციის მონაწილეები აცხადებენ, რომ „მთავრობა ცრუობს” და არ სჯერათ ჯანდაცვის მინისტრის, რომელიც ამბობს, რომ კლინიკა დემონტაჟს საჭიროებს. რესპუბლიკური საავადმყოფოს თანამშრომლები მოითხოვენ, რომ ჯერ აშენდეს ახალი კლინიკა და ძველი საავადმყოფო ამის შემდეგ დაანგრიონ.
მათი არც იმ დაპირების სჯერათ, რომ სამსახურს არ დაკარგავენ. მედპერსონალის თქმით, საავადმყოფოს დანგრევისა და ახლის აშენების შემთხვევაში, ამჟამად იქ მომუშავე პერსონალი სამსახურს დაკარგავს. მათი სურვილია, ახალი კლინიკის აშენებამდე მუშაობა ჩვეულებრივ რეჟიმში გააგრძელონ.
რესპუბლიკური საავადმყოფოს თანამშრომლებმა მათი კლინიკის დანგრევის შესახებ ჯანდაცვის მინისტრის სატელევიზიო ინტერვიუდან შეიტყვეს, რასაც შემდეგ პროტესტი მოჰყვა.
ჯანდაცვის სამინისტრო კვლავ აცხადებს, რომ ძველი შენობის რეაბილიტაცია გაუმართლებელი იქნება, თუმცა, იქვე განმარტავს, რომ შენობას სამხარაული ექსპერტიზის ბიურო სწავლობს და საბოლოო გადაწყვეტილებას მისი დასკვნის საფუძველზე მიიღებენ.
ჯანდაცვის მინისტრი ზურაბ აზარაშვილი აცხადებს, რომ მის მიერ ინტერვიუში ნათქვამი იყო „წინასწარი და არა საბოლოო დასკვნა.“ მინისტრის თქმით, შენობის რეკონსტრუქციის დროს პირველ რიგში ხარჯთეფექტურობა უნდა შეფასდეს.
