მოქალაქეებს, რომლებიც კრედიტის მისაღებად სესხის გამცემ ორგანიზაციებს მიმართავენ, საშუალება ექნებათ ფულადი გზავნილების შესახებ ინფორმაციაც წარუდგინონ.
უცხო ქვეყნიდან მიღებული ფულადი გზავნილების შესახებ ინფორმაცია საინფორმაციო ბიურო კრედიტინფო საქართველოს ბაზაში იქნება დაცული. ხოლო სესხის გამცემი ორგანიზაციები ვალდებულნი იქნებიან საკრედიტო საინფორმაციო ბიუროს სუბიექტის/მომხმარებლის მიერ განაღდებული ფულადი გზავნილების შესახებ ინფორმაცია მიაწოდონ.
აღნიშნული ცვლილება, ეროვნული ბანკის გადაწყვეტილებით, 2023 წლის 1-ელი მარტიდან ამოქმედდება. სებ-ის განმარტებით, ამ გადაწყვეტილების მთავარ მიზანს მოსახლეობისათვის საკრედიტო პროდუქტებზე ხელმისაწვდომობის გაზრდა წარმოადგენს, შესაბამისად, დაეხმარება გზავნილის მიმღებ პირებს მათთვის საუკეთესო პირობებით და საუკეთესო პროცენტში მიიღონ სესხი.
ინფორმაცია, რომელიც საკრედიტო ბიუროს ბაზაში მოიყრის თავს, ძირითადად მოიცავს უცხო ქვეყნიდან განხორციელებული ფულადი გზავნილების შესახებ ისეთი მონაცემების მიწოდებას როგორებიცაა:
- ქვეყანა, საიდანაც მოხდა გადმორიცხვა;
- გადმორიცხვის თარიღი (თუ ფულადი გზავნილის ტიპი იძლევა ამ ინფორმაციის მოძიების საშუალებას);
- განაღდების თარიღი;
- მიმღების პირადი ნომერი (უცხო ქვეყნის მოქალაქის შემთხვევაში – პირადობის დამადასტურებელი დოკუმენტის ნომერი);
- მიმღების მოქალაქეობა;
- თანხის ოდენობა;
- ვალუტა.
აღსანიშნავია, რომ სესხის გამცემ ორგანიზაციებს მონაცემთა სუბიექტის/მომხმარებლის მიერ ფულადი გზავნილებიდან მიღებულ შემოსავალზე წვდომა მხოლოდ მათი შესაბამისი თანხმობის საფუძველზე ექნებათ. მონაცემების ბიუროსთვის მიწოდება დამოკიდებულია მონაცემთა სუბიექტს/მომხმარებელს სურვილზე და სურვილის შემთხვევაში მონაცემთა სუბიექტს/მომხმარებელს უფლება აქვს აღნიშნული ინფორმაციის ბიუროსთვის მიწოდებაზე განაცხადოს უარი.
საინფორმაციო ბიუროს რეგულირების წესში ცვლილებები ეროვნულმა ბანკმა გასული წლის სექტემბერში განახორციელა. კრედიტინფო ფულადი გზავნილების სახით მიღებული შემოსავლის შესახებ ინფორმაციას ერთი წლის მანძილზე შეინახავს.
