გერმანია წლების განმავლობაში ინდუსტრიული წარმოების მხარდასაჭერად ელექტროენერგიაზე დაბალ ფასებს ინარჩუნებდა. ამ მექანიზმით ქვეყნის მთავრობა ცდილობდა, გერმანიაში დარჩენილიყვნენ კომპანიები, რომლებიც დიდი ოდენობით ენერგიას მოიხმარენ და რომლებიც ძირითადი დამსაქმებლები არიან. გარდა ამისა, ეს გადაწყვეტილება გერმანიის წარმოების კონკურენტუნარიანობასაც ზრდიდა.
უკრაინაში რუსეთის შეჭრის შემდეგ, ენერგოხარჯები მკვეთრად გაიზარდა, რადგან მოსკოვმა შეამცირა ევროპისთვის გაზის მიწოდება. ამიტომ გერმანიის ეკონომიკის სამინისტრო გეგმავს, ელექტროენერგიის ფასის „ჭერი“ შემოიღოს მრეწველობისთვის, რომელიც დიდი ოდენობით ენერგიას მოიხმარს, რათა სექტორი ხარჯების მკვეთრი ზრდისგან დაიცვას.
შეღავათიანი რეჟიმი უნდა შეეხოს გერმანული კომპანიების მინიმუმ 80%-ს ენერგოინტენსიური ინდუსტრიებიდან, როგორიცაა ქიმიკატების, ფოლადისა და მინის წარმოება.
გეგმის მიხედვით, ინდუსტრიისთვის ტარიფი კვტ.სთ-ზე 6 ევროცენტით შემცირდება და შეღავათიანი რეჟიმი 2030 წლამდე იმოქმედებს.
გერმანიაში 2022 წლის მეორე ნახევრიდან ელექტროენერგიის ფასი არასაყოფაცხოვრებო მომხმარებლებისთვის გადასახადების გარეშე საშუალოდ 0,18 ევრო იყო.
ფასთა შორის სხვაობა გერმანიის ბიუჯეტს €25-30 მილიარდი დაუჯდება.
გერმანიის პარლამენტმა ნოემბერში დაამტკიცა €200 მილიარდის ენერგორესურსების გეგმა, რათა დაიცვას მომხმარებლები და ბიზნესი ენერგიის მაღალი ხარჯებისგან 2024 წლის აპრილამდე. მთავრობა ინდუსტრიის სუბსიდირებას ამ თანხიდან გეგმავს.
გადაწყვეტილებას აკრიტიკებენ გერმანიის სამთავრობო კოალიციაში, სოციალ-დემოკრატები, მწვანეები და მას „ეკონომიკურად არაგონივრულს“ უწოდებენ.
გერმანიის მიერ საკუთარი ინდუსტრიის სუბსიდირება შესაძლოა, დაიწუნოს ბრიუსელმაც, რადგან ევროკომისია ემხრობა უფრო ფართო ევროპული სტრატეგიის შემუშავებას ენერგო ინტენსიური ინდუსტრიების გასაძლიერებლად.
