გერმანიის მრეწველობას მოუწევს სიმძლავრის შემცირება, თუ რუსეთი და უკრაინა არ განაახლებენ შეთანხმებას რუსული გაზის ტრანზიტის შესახებ უკრაინის ტერიტორიის გავლით. ამის შესახებ გერმანიის ეკონომიკის მინისტრმა რობერტ ჰაბეკმა განაცხადა.
მისი თქმით, ამ შემთხვევაში გერმანიას გაზის დეფიციტი შეექმნება და იძულებული გახდება, შეზღუდოს ან მთლიანად გამორთოს წარმოება.
უკრაინის ტერიტორიაზე გაზის ტრანზიტის შესახებ რუსეთთან გაფორმებულ ხელშეკრულებას ვადა მომავალი წლის ბოლოს ეწურება.
გერმანია ამჟამად ქვეყნის ჩრდილოეთ ნაწილში აშენებს LNG ტერმინალს, რომელსაც შეუძლია გადამწყვეტი როლი ითამაშოს გერმანიის და აღმოსავლეთ ევროპის ენერგიით უზრუნველყოფაში.
2022 წელს ევროკავშირის ქვეყნების მთავრობებს ბუნებრივი აირით მომარაგებაში შექმნილი სირთულეების გამო, კომპანიებისა და მაცხოვრებლებისთვის $646 მილიარდის სუბსიდიის გადახდა მოუხდათ. მიმდინარე სეზონზე ისინი მსგავსი ფინანსური დახმარებების გაწევას არ აპირებენ.
