ოქროს ფასის ზრდა თითქმის ერთი თვეა გრძელდება. SVB-ის, Signature Bank-ის და Credit Suisse-ის გაკოტრებამ ფინანსურ ბაზრებზე პანიკა გამოიწვია. რასაც აშშ-ის ფედერალური რეზერვის მიერ საპროცენტო განაკვეთის 0,25%-ით ზრდა მოჰყვა.
საბანკო ბაზარზე შექმნილმა არასტაბილურმა ვითარებამ ინვესტორებს უბიძგა, ფსონი უფრო სტაბილურ აქტივზე გაეკეთებინათ. მსგავს სიტუაციაში ინვესტორების თავშესაფარი ტრადიციულად, ოქროა. ძვირფას ლითონზე მოთხოვნის ზრდის გამო, კვირის დასაწყისში, უნცია ოქროს ფასი $2 000-ს გადასცდა.
კვირის ბოლოს, დოლარის კურსის გამყარებამ ოქროს ფასის ზრდა შეანელა, თუმცა, ძვირფასი ლითონი კვლავ გაძვირებული რჩება. პარასკევს, უნცია ოქრო $1 980-ს მიდამოებში ივაჭრებოდა, ვერცხლი $23-ის ფარგლებში იყო.
სპეციალისტები 2023 წლის განმავლობაში ოქროს გაძვირებას უწინასწარმეტყველებენ.
Commerzbank ელის, რომ წლის ბოლომდე უნცია ოქროს ფასი $2 000-მდე აიწევს, იმ მოტივით, რომ Fed-მა განაკვეთების შემცირება 2024 წლისთვის გადადო.
ექსპერტების შეფასსებით, ნებისმიერი შეშფოთება, რაც აშშ-ის ბანკების არასაკმარის კაპიტალიზაციასთან დაკავშირებით წარმოიქმნება, ოქროს ზრდის ფაქტორი იქნება.
2023 წლის პროგნოზი $1 850-დან $1 950-მდე გაზარდა Fitch Solutions-მა, რასაც საბანკო პრობლემებით გამოწვეული რეცესიის შიშით ახსნა. Fitch Solutions არც იმას გამორიცხავს, უნციის ფასმა უახლოეს კვირებში $2 075 -საც მიაღწიოს
მოსალოდნელია, რომ რუსეთის შეჭრა უკრაინაში გაგრძელდება მინიმუმ 2023 წლის მეორე ნახევარში, ხოლო დაძაბულობა აშშ-სა და ჩინეთს შორის, სავარაუდოდ, გაიზრდება, რაც ინვესტორების ინტერესს ოქროს მიმართ ისევ გაზრდის, რადგან ისინი ფულის დაბანდებისთვის კვლავაც უსაფრთხო აქტივს მიაკითხავენ.
