JPMorgan-ი ყიდულობს გაკოტრებულ First Republic Bank-ის აქტივების უმეტესობას. ის, ამავე დროს, გადაიბარებს კრედიტორების ყველა დეპოზიტს. გარიგება დღეს, აშშ-ის დეპოზიტების დაზღვევის ფედერალური კორპორაციის (FDIC) მონაწილეობით შედგა.
JPMorgan-მა განაცხადა, რომ შეიძინა „აქტივების უმრავლესობა“ და გადაიბარა გაკოტრებული ბანკის დეპოზიტები, დაზღვეულიც და დაუზღვეველიც FDIC-ისგან, დამოუკიდებელი სამთავრობო სააგენტოსგან, რომელიც ბანკის მომხმარებლების დეპოზიტებს აზღვევს.
ბანკის განცხადებაში ნათქვამია, რომ ამ ტრანზაქციით JPMorgan Chase მხარს უჭერს აშშ-ის ფინანსურ სისტემას.
ამ გარიგების სწრაფად დასრულებით ფედერალური მარეგულირებელი შეეცადა, გადაერჩინა საბანკო სისტემის მიმართ მომხმარებელთა ნდობა, რომლებმაც ბოლო პერიოდში სამი ძირითადი ბანკის კრიზისი იხილეს.
FDIC-მა, დეპოზიტარების გადარჩენის მიზნით, ერთი თვის წინ ორი გაკოტრებული ბანკი – Silicon Valley Bank და Signature Bank გადაიბარა.
გარიგების დასრულების შემდეგ First Republic Bank-ის 84 ოფისი ხელახლა გაიხსნება უკვე როგორც JPMorgan Chase Bank-ის ფილიალები.
First Republic Bank-მა ოპერირება 1985 წელს სან-ფრანცისკოს ერთი ფილიალით დაიწყო. მარტის ბოლოსთვის ბანკიდან $233 მილიარდის დეპოზიტები გაიტანეს, რის შემდეგაც ის გაკოტრების წინაშე აღმოჩნდა. ფედერალური რეზერვის რეიტინგის მიხედვით, ის ქვეყნის სიდიდით მე-14 ბანკი იყო.
