ბრიტანულმა დაზვერვამ განმარტა, 2023 წლის აპრილში რატომ შემცირდა უკრაინაში რუსული არმიის ცოცხალი ძალის ყოველდღიური დანაკარგი, წინა თვეებთან შედარებით. საშუალოდ დაახლოებით 30%-ით.
განსაკუთრებით დიდი დანაკარგი რუსულ არმიას იანვარ-მარტში ჰქონდა – დღეში საშუალოდ 776 ჯარისკაცი. აპრილში ეს რიცხვი 568-მდე ჩამოვიდა.
დიდი ბრიტანული დაზვერვის მონაცემებით, აპრილში საოკუპაციო ძალების დანაკარგები მნიშვნელოვნად შემცირება თავდაცვაზე გადასვლის გამო მოხდა.
ამის შესახებ დიდი ბრიტანეთის თავდაცვის სამინისტრო Twitter-ზე წერს.
როგორც თავდაცვის უწყება აღნიშნავს, „დაზვერვა ვერ ამოწმებს უკრაინის გენერალური შტაბის მიერ გამოყენებულ მეთოდოლოგიას, მაგრამ ზოგადი ტენდენცია, სავარაუდოდ, ზუსტია. სავარაუდოა, რომ რუსების მსხვერპლი შემცირდა მას შემდეგ, რაც ზამთრის თავდასხმის მცდელობებმა მიზანს ვერ მიაღწია და რუსული ძალები ახლა უკრაინის მოსალოდნელ კონტრშეტევაზე არიან ორიენტირებული“, – ნათქვამია განცხადებაში.
ასევე, ბრიტანულმა დაზვერვამ განაცხადა, რომ მიუხედავად იმისა, რომ გაზაფხულზე ნიადაგის მდგომარეობა ნამდვილად ართულებს საომარი მოქმედებების ჩატარებას, რუსული პროპაგანდა აზვიადებს ამ ფაქტორის გავლენას უკრაინის მოსალოდნელ კონტრშეტევაზე.
ანალიტიკოსების აზრით, ზაპოროჟიეს ფრონტის გასწვრივ რუსების მიერ აშენებულმა თავდაცვის ხაზებმა, უკრაინის კონტრშეტევას შეიძლება, გარკვეული სირთულეები შეუქმნას. თუმცა, მისი ეფექტურობა დამოკიდებული იქნება იმაზე, ეყოლება თუ არა უკრაინის არმიას საკმარისი ცოცხალი ძალა შესაბამისი საცეცხლე მხარდაჭერით.
