ამერიკელმა მომღერალმა ბიონსემ, სტოკჰოლმიდან მსოფლიო ტურნეს დაწყებით, შვედეთში ინფლაციის ზრდა გამოიწვია. ამის შესახებ Politico წერს.
შვედეთის სტატისტიკის სამსახურის მონაცემებით, აპრილიდან მაისამდე ქვეყანაში ინფლაციის დონემ 0,3% შეადგინა. ფასების ზრდა ნაწილობრივ განაპირობა სასტუმროებისა და რესტორნების მომსახურებასა და რეკრეაციულ სერვისებზე, მათ შორის კონცერტის ბილეთებზე გაზრდილმა მოთხოვნამ.
შვედი ეკონომისტების ვარაუდით, ბიონსეს მსოფლიო ტურნეს დაწყებამ მაისის ინფლაცია 0.2%-დან 0.3%-მდე გაზარდა.
შვედეთში ამ ფაქტს უპრეცედენტო და გასაკვირი უწოდეს. მასობრივ კულტურულ და სპორტულ ღონისძიებებს მართლაც შეუძლია გამოიწვიოს ფასების მოკლევადიანი ზრდა ადგილობრივ სასტუმროებსა და რესტორნებზე, მაგრამ იშვიათია, რომ ისინი გავლენას ახდენენ მთელი სახელმწიფოს ინფლაციის მაჩვენებელზე.
