Galt & Taggart-ის მიერ ჩატარებული უძრავი ქონების ბაზრის კვლევა აჩვენებს, რომ თბილისში 2023 წლის დასაწყისიდან მოყოლებული, საცხოვრებელ უძრავ ქონებაზე მოთხოვნა შენელდა, მაგრამ ფასები და ქირა მაღალ ნიშნულზე რჩება.
ფასები
უძრავი ქონების ფასები აპრილის თვეში წლიურად 31.1%-ით გაიზარდა აშშ დოლარში, მაგრამ ლარის გამყარებამ შეამსუბუქა მომხმარებლებზე ზეწოლა, რადგან ლარში წინა წლის აპრილთან შედარებით, მხოლოდ 7.9%-იანი ზრდა დაფიქსირდა.
გარიგებების მოცულობა
ფასების მუდმივი ზრდის მიუხედავად, შემცირებულმა ტრანზაქციებმა გამოიწვია საცხოვრებელი უძრავი ქონების ბაზრის მთლიანი ზომის ვარდნა აპრილში $176.4 მილიონამდე, რაც წლიურად 16.8%-იანი, ხოლო თვიურად 21.5%-იანი შემცირებაა.
ქირა
უძრავი ქონების იჯარა მაღალ ნიშნულზე შენარჩუნდა (+52.3% წ/წ) 2023 წლის აპრილში, თუმცა, 2023 წლის თებერვლიდან მოყოლებული, ზრდის ტემპი შენელებულია.
Galt & Taggart-ის შეფასებით, მონეტარული პოლიტიკის შემსუბუქება, მყარი ლარი და გაუმჯობესებული განწყობები მომავალში ხელს შეუწყობს ბინების გაყიდვებს.
რაც შეეხება ფასების პროგნოზს, Galt & Taggart ვარაუდობს, რომ სამშენებლო ხარჯების დასტაბილურება, ბაზარზე უძრავი ქონების მდგრადი მიწოდება და შენელებული მოთხოვნა ფასების ზრდას შეზღუდავს, ხოლო ენერგოეფექტურობის მოახლოებული რეგულაცია ფასებზე ზრდის მიმართულებით ზეწოლას მოახდენს.
