2023 წლის პირველ კვარტალში ბიზნეს სექტორის ბრუნვის მოცულობამ, რომელიც 2022 წლის მეორე კვარტლიდან იზრდებოდა, შემცირება დაიწყო და ₾44.1 მილიარდი შეადგინა. ეს თითქმის 15%-იანი კლებაა წინა – 2022 წლის მეოთხე კვარტალთან შედარებით. განახლებული მონაცემები საქსტატმა გამოაქვეყნა.
ამასთანავე, ეს მაჩვენებელი 14.4%-ით მეტია გასული წლის შესაბამის პერიოდთან შედარებით.
რაც შეეხება პროდუქციის გამოშვებას, პირველ კვარტალში წარმოებამ ₾15.9 მილიარდი შეადგინა, რაც 19.7%-ით ნაკლებია წინა კვარტალზე, როცა წარმოების მოცულობა ₾19.8 მილიარდი იყო.
ხოლო წინა წლის ანალოგიურ პერიოდთან შედარებით 12.8%-ით მეტია (2022წ. პირველი კვარტალი – ₾14.1 მლრდ).
პირველ კვარტალში ბიზნეს სექტორის ბრუნვის მოცულობის 69.3%-ს მსხვილი ბიზნესი ქმნის, 14%-ს – საშუალო, ხოლო 16.7%-ს – მცირე ბიზნესი.
მცირედით განსხვავებული მდგომარეობაა გამოშვებული პროდუქციის შემთხვევაში:
მსხვილ ბიზნესზე მოდის გამოშვებული პროდუქციის 49.2%, საშუალოზე – 23%, ხოლო მცირე ბიზნესზე – 27.8%.
