საქართველოს ბიზნეს ასოციაციის (BAG) მიერ გამოკითხული კომპანიებიდან 50%-მა 2023 წლის პირველი კვარტალში მათი საქმიანობისთვის ყველაზე მნიშვნელოვან ხელის შემშლელ ფაქტორად სამართლებრივი და ადმინისტრაციული ბარიერების არსებობა დაასახელა. ხელისშემშლელ ფაქტორებს შორის, მესამე ადგილზეა, სამუშაო ძალის ნაკლებობა (47%), შემდეგ მოდის ლარის კურსის არასტაბილურობა (30%) და შეზღუდული ფინანსური რესურსები (17%).
ცნობისთვის, 2022 წლის მეოთხე კვარტალშიც, ბიზნესი მთავარ პრობლემად სამართლებრივ და ადმინისტრაციულ ბარიერებს ასახელებდა. საგულისხმოა, რომ BAG-ის ინდექსით, აღნიშნული მაჩვენებელი წინა კვარტალში 10%-ით მაღალი იყო.
მიმდინარე კვარტალში ჩამოთვლილ ფაქტორებს შორის გამწვავდა შეზღუდული ფინანსური რესურსების პრობლემაც, რომელიც წინა კვარტალთან შედარებით 8%-ით არის გაზრდილი.
სექტორებს შორის, სამართლებრივ და ადმინისტრაციულ ბარიერებს განსაკუთრებულ მწვავე პრობლემად კვლავ მომსახურებისa და მშენებლობის სექტორები ასახელებენ. თუმცა, წინა კვარტალთან შედარებით, მაჩვენებლები მცირედით გაუმჯობესებულია.
აღსანიშნავია, რომ სპეციალისტების ნაკლებობის პრობლემა მკვეთრად გამწვავდა მრეწველობის სექტორში. კერძოდ, წინა კვარტალთან შედარებით აღნიშნული მაჩვენებელი 51%-ით არის გაზრდილი. ამავე სექტორის კომპანიები ყველაზე ხშირად ასახელებენ ლარის კურსისა და შეზღუდული ფინანსური რესურსების პრობლემებს.
გამოკითხვამ აჩვენა, რომ მშენებლობის სექტორისთვის, მიმდინარე კვარტალში შემსუბუქდა სპეციალისტების ნაკლებობით და ეროვნული ვალუტის გაცვლითი კურსით გამოწვეული პრობლემები.
