KazMunayGas-მა აზერბაიჯანულ SOCAR-თან შეთანხმების პრაქტიკული განხორციელება დაიწყო.
ყაზახური ნავთობის პირველმა პარტიამ, რომელიც 80 ათას ტონას შეადგენს, უკვე გაიარა ბაქო-ჯეიჰანის მილსადენი. ამჟამად ჯეიჰანის ტერმინალიდან ნავთობი ტანკერებით გადააქვთ რუმინეთის პორტის – კონსტანცას მიმართულებით, ნავთობგადამამუშავებელი ქარხანა Petromidia-ში.
გასული წლის ბოლოს KazMunayGas-ს და SOCAR-ს შორის ხელი მოეწერა ხუთწლიან ხელშეკრულებას, აქტაუ-ბაქო-ჯეიჰანის მარშრუტით 1,5 მილიონი ტონა ნავთობის ტრანზიტის შესახებ. ხოლო მიმდინარე წლის მარტში დაიწყო ყაზახური ნავთობის გადაზიდვა აქტაუ-ბაქოს მიმართულებით. ყაზახეთისა და აზერბაიჯანის ფლოტი ნავთობის ტრანსპორტირებაში პარიტეტული პრინციპით არიან ჩართული. 20 აპრილის მდგომარეობით, აქტაუს პორტიდან 86 ათასი ტონა იყო გადაზიდული.
უკრაინაში ომის დაწყების შემდეგ, ყაზახეთმა გაზარდა ნავთობის ექსპორტი რუსეთის გვერდის ავლით და ამისთვის ცდილობს, გამოიყენოს მარშრუტი, რომელიც კასპიის ზღვასა და საქართველოს ტერიტორიას გაივლის.
ექსპორტის მოცულობა ამ მარშრუტით შედარებით მცირეა, მაგრამ აჩვენებს, რომ ყაზახეთს სურს, შეამციროს თავისი დამოკიდებულება რუსეთზე.
ყაზახეთიდან ნავთობის ექსპორტის მთავარი და ყველაზე მომგებიანი მარშრუტი ჯერჯერობით ისევ კასპიის მილსადენია (CPC), რომელიც მსოფლიო ბაზარს რუსული შავი ზღვის ტერმინალის მეშვეობით ამარაგებს.
ყაზახეთის ნავთობის მთლიანი ექსპორტის 80%-ზე მეტი ისევ CPC-ის მეშვეობით გადაიზიდება.
